سندھ حکومت نے خواتین کے لیے مفت الیکٹرک اسکوٹی اسکیم کے لیے اہلیت کے معیار اور درخواست دینے کے عمل کا اعلان کردیا ہے اس معیار پر پورا اترنے والی خواتین کو فری سکوٹی فراہم کی جائے گی۔ خواتین کے لیے مفت الیکٹرک اسکوٹی اسکیم میں درخواست دینے کے لیے اہلیت کا معیار اور درخواست دینے کا طریقہ کار سامنے آگیا۔
قرعہ اندازی کے ذریعے منتخب ہونے والے خواتین کو سڑک کی حفاظت کے لیے مہارت کا امتحان دینا ہوگا۔ای وی اسکوٹیز کی تقسیم قرعہ اندازی کے ذریعے کی جائے گی۔ قرعہ اندازی کی شفافیت کو یقینی بنانے کے لیے ایک کمیٹی تشکیل دی جائے گی، جس میں ایکسائز، ٹرانسپورٹ، فنانس ڈیپارٹمنٹس اور میڈیا کے نمائندے شامل ہوں گے۔
اس اسکیم سے فائدہ اٹھانے کے لیے درخواست گزار کا سندھ کا مستقل شہری اور اسٹوڈنٹ یا ملازمت پیشہ خاتون ہونا لازمی قرار ہے۔ اس کے علاوہ درخواست دہندہ کے پاس مصدقہ ڈرائیونگ لائسنس کا ہونا ضروری ہے جبکہ قرعہ اندازی کے ذریعے اسکوٹی ملنے پر 7 سال تک اسے فروخت نہ کرنے کی بھی پابندی ہوگی۔
درخواست گزار کے لیے ضروری ہے کہ فری سکوٹی کے حصول کے لیے سندھ حکومت کی آفیشل ویب سائٹ پر وزٹ کریں اور درخواست فارم پر کلک کریں۔ مطلوبہ دستاویزات منسلک کریں، اور جمع کرائیں۔
