پنجاب حکومت کے مری گلاس ٹرین منصوبے کے روٹ کو اسلام آباد انٹرنیشنل ایئرپورٹ تک بڑھانے کی تجویز سامنے آ گئی ہے۔ اسلام آباد سے مری سفر کے دوران سیاح قدرتی اور دلکش نظاروں سے لطف اندوز ہو سکیں گے۔
میڈیا رپورٹس کے مطابق پنجاب حکومت راول جھیل پارک اور بھارہ کہو بائی پاس سے مری تک گلاس ٹرین سروس شروع کرنے کے لیے عملی اقدامات کر رہی ہے، جبکہ منصوبے کے کنسلٹنٹ نے سی ڈی اے کو تجویز دی ہے کہ اس مجوزہ روٹ کو فیض آباد کے راستے اسلام آباد ایئرپورٹ تک توسیع دی جائے گی۔
یہ تجویز پنجاب حکومت، نیسپاک اور سی ڈی اے کے حالیہ اجلاسوں میں زیرِ غور آئی، جہاں منصوبے کے اگلے مرحلے میں پیشرفت تیز کرنے پر اتفاق ہوا۔ حکام کے مطابق منصوبے کی فزیبلٹی اسٹڈی پہلے ہی مکمل کی جا چکی ہے۔ موجودہ منصوبے کے مطابق گلاس ٹرین بھارہ کہو بائی پاس سے مری کے پنڈی پوائنٹ تک طویل ٹریک پر چلے گی۔
وزیراعلیٰ پنجاب کے مشیر شاہد اشرف تارڑ کی قیادت میں صوبائی وفد نے چیئرمین سی ڈی اے محمد علی رندھاوا اور بورڈ ممبران سے ملاقات کی، جس دوران مری گلاس ٹرین کو اسلام آباد ایئرپورٹ سے منسلک کرنے کی تجویز باقاعدہ پیش کی گئی۔
مزید معلوم ہوا ہے کہ سی ڈی اے کی پری فزیبلٹی تیار کرنے میں نیسپاک معاونت فراہم کرے گا، اور اس سلسلے میں نیسپاک اپنی ابتدائی رپورٹ سی ڈی اے کو دے چکا ہے۔
کنسلٹنٹ نے ایئرپورٹ سے فیض آباد تک موجودہ میٹرو ٹریک کو مونوریل کے طور پر استعمال کرنے کی تجویز دیتے ہوئے کہا ہے کہ فیض آباد سے بھارہ کہو بائی پاس تک 13 کلومیٹر نیا ٹریک تعمیر کیا جائے، جو مجوزہ مین اسٹیشن (لیک ویو پارک اور بائی پاس) سے منسلک ہوگا۔
اگلے مرحلے میں راول جھیل سے فیض آباد تک ایکسپریس وے کے ساتھ ساتھ روٹ بڑھانے کی تجویز بھی شامل ہے تاکہ اسے مونوریل نیٹ ورک کے ساتھ جوڑا جا سکے۔
