آزاد جموں و کشمیر الیکشن کمیشن نے سکیورٹی خدشات کے باعث 2026 کے قانون ساز اسمبلی انتخابات ایک ہی روز کرانے کے بجائے تین مراحل میں منعقد کرنے کا فیصلہ کیا ہے۔ اس سلسلے میں نظرثانی شدہ انتخابی شیڈول بھی جاری کر دیا گیا ہے۔
مظفرآباد میں میڈیا سے گفتگو کرتے ہوئے چیف الیکشن کمشنر جسٹس (ر) غلام مصطفیٰ مغل نے الیکشن کمیشن کے دیگر ارکان اور سیکرٹری راجہ محمد شکیل خان کے ہمراہ نئے انتخابی پروگرام کا اعلان کیا۔ ان کا کہنا تھا کہ انتخابی عمل کو پرامن، شفاف اور منظم انداز میں مکمل کرنے کے لیے یہ فیصلہ تمام متعلقہ فریقوں سے مشاورت کے بعد کیا گیا۔
الیکشن کمیشن کے مطابق پہلے مرحلے میں میرپور ڈویژن میں پولنگ 27 جولائی کو شیڈول کے مطابق ہوگی۔ دوسرے مرحلے میں مظفرآباد ڈویژن اور پاکستان میں مقیم مہاجرینِ جموں و کشمیر کے لیے مختص 12 نشستوں پر ووٹنگ 2 اگست جبکہ تیسرے مرحلے میں پونچھ ڈویژن کے حلقوں میں 10 اگست کو پولنگ ہوگی۔
مرحلہ وار الیکشن کا فیصلہ کیوں کیا گیا ؟
سیکرٹری الیکشن کمیشن راجہ محمد شکیل خان نے بتایا کہ موجودہ سکیورٹی حالات کو مدنظر رکھتے ہوئے مرحلہ وار انتخابات کرانے کا مقصد یہ ہے کہ ہر مرحلے میں فوج اور دیگر قانون نافذ کرنے والے ادارے مؤثر انداز میں سکیورٹی فراہم کر سکیں اور ووٹنگ کا عمل کسی رکاوٹ کے بغیر مکمل ہو۔
یہ فیصلہ ایسے وقت میں سامنے آیا ہے جب آزاد کشمیر میں سیاسی کشیدگی اور سکیورٹی خدشات میں اضافہ دیکھا جا رہا ہے۔ حالیہ دنوں میں بعض مقامی گروپوں اور حکومت کے درمیان اختلافات شدت اختیار کر گئے، جبکہ مختلف مقامات پر احتجاج اور فورسز کے ساتھ جھڑپوں کے واقعات بھی رپورٹ ہوئے جن میں جانی نقصان بھی ہوا۔
مذید خبریں
آزاد کشمیر: جوائنٹ عوامی ایکشن کمیٹی نے لانگ مارچ مؤخر کر دیا، دھرنا جاری – urdureport.com
آزاد کشمیر سیاست : سردار تنویر الیاس کا چوتھی بار سیاسی قبلہ تبدیل – urdureport.com
ادھر حکومت کی جانب سے کالعدم قرار دی گئی کشمیر ایکشن کمیٹی کی طرف سے باضابطہ ردعمل سامنے نہیں آیا، تاہم تنظیم سے وابستہ رہنما عمر نذیر کشمیری نے سوشل میڈیا پر جاری بیان میں احتجاجی شٹر ڈاؤن اور پہیہ جام جاری رکھنے کا اعلان کیا ہے۔ ان کا کہنا ہے کہ 23 جولائی کو آئندہ لائحہ عمل کے حوالے سے اہم سرگرمیاں متوقع ہیں۔
