بحریہ ٹاون کا آفس سیل ،سی ڈی اے ایکشن میں

اردو رپورٹ ڈیسک

اسلام آباد میں کیپٹل ڈیولپمنٹ اتھارٹی (سی ڈی اے) نے منظور شدہ لے آؤٹ پلان کی مبینہ خلاف ورزیوں پر بحریہ ٹاون سمیت چار ہاؤسنگ سوسائٹیز کے دفاتر سیل کرنے کی ہدایت کردی۔

سی ڈی اے کے انفورسمنٹ ونگ کو جاری ہدایات میں سوان گارڈن، بحریہ ٹاؤن، جناح گارڈن اور اکاؤنٹس گروپ آفیسرز کوآپریٹو ہاؤسنگ سوسائٹی (اے جی او سی ایچ ایس) کے دفاتر سیل کرنے کا کہا گیا ہے۔

سی ڈی اے کی پلاننگ ونگ کی جانب سے جاری سرکاری خطوط کے مطابق ان سوسائٹیز نے مبینہ طور پر منظور شدہ لے آؤٹ پلان کی خلاف ورزی کی۔ حکام کے مطابق متعدد نوٹسز جاری ہونے کے باوجود متعلقہ سوسائٹیز سی ڈی اے کی شرائط پوری کرنے میں ناکام رہیں۔

سوان گارڈن پر کیا الزام ہے؟

سی ڈی اے نے سوان گارڈن پر پارکس، قبرستان اور عوامی عمارتوں کے لیے مختص جگہوں کو مبینہ طور پر غیر قانونی طور پر تبدیل کرنے کا الزام عائد کیا ہے۔

اتھارٹی کے مطابق سوسائٹی نے 585 کنال اراضی پر منظور شدہ لے آؤٹ پلان اور این او سی کے بغیر ترقیاتی کام بھی کیے۔

بحریہ ٹاؤن سے متعلق سی ڈی اے کا مؤقف

سی ڈی اے کے مطابق بحریہ ٹاؤن نے اپنے فیز تھری ای اور فیز فور منصوبے کی منظوری سے منسلک شرائط پوری نہیں کیں۔

اتھارٹی نے دیگر مراحل میں پارکس، قبرستان اور عوامی عمارتوں کے لیے مختص جگہوں سے متعلق بھی مبینہ خلاف ورزیوں کی نشاندہی کی ہے۔

جناح گارڈن اور اے جی او سی ایچ ایس

سی ڈی اے نے جناح گارڈن پر این او سی حاصل کیے بغیر منصوبے تیار کرنے کا الزام عائد کیا ہے۔ اتھارٹی کے مطابق پارکس، گرین ایریاز اور عوامی سہولیات، جن میں اسکول، اسپتال اور قبرستان شامل ہیں، کے لیے مختص جگہوں کو بھی مبینہ طور پر تبدیل کیا گیا۔

اے جی او سی ایچ ایس ہاؤسنگ اسکیم ون کے حوالے سے سی ڈی اے نے بتایا کہ اس کا لے آؤٹ پلان منسوخ کیا جاچکا ہے۔ اتھارٹی نے سوسائٹی پر عوامی سہولیات کے لیے مختص جگہوں کو مبینہ طور پر تبدیل کرنے کا الزام بھی عائد کیا ہے۔

ایک سینئر سی ڈی اے افسر نے تصدیق کی کہ سوسائٹیز کو شوکاز اور حتمی نوٹس جاری کیے جانے کے بعد ان کے دفاتر سیل کرنے کی کارروائی کی جائے گی۔