اردو رپورٹ ڈیسک
اسلام آباد: وزارت مذہبی امور نے حج 2027 کے لیے لیبر کوٹہ کی درخواستوں کی وصولی شروع کرتے ہوئے حج پورٹل فعال کر دیا ہے۔ ادارے اور نجی رجسٹرڈ کمپنیاں اپنے خرچ پر کم آمدن والے ملازمین کو حج کرانے کے لیے درخواستیں جمع کرا سکیں گی۔
اہل ملازمین کے لیے شرائط
ترجمان وزارت مذہبی امور کے مطابق کم آمدن والے ملازمین، صنعتی کارکنان، کان کن اور دیگر اہل مزدور ہی لیبر کوٹہ کے تحت حج کے لیے اہل ہوں گے۔
صرف آن لائن درخواستیں جمع ہوں گی
ترجمان کے مطابق ادارے اور کمپنیاں لیبر کوٹہ کے لیے صرف حج پورٹل کے ذریعے آن لائن درخواست جمع کرا سکیں گی۔ درخواست گزار کمپنی یا ادارہ حج پورٹل پر اکاؤنٹ بنا کر متعلقہ ملازمین کی تفصیلات درج کرے گا۔
حج واجبات جمع کرانے کا طریقہ
وزارت مذہبی امور کے مطابق حج کے واجبات صرف متعلقہ کمپنی یا ادارے کے اکاؤنٹ سے جمع کرائے جا سکیں گے۔
درخواستوں کی آخری تاریخ
ترجمان وزارت مذہبی امور کے مطابق حج 2027 کے لیبر کوٹہ کے لیے درخواستیں 10 اکتوبر تک وصول کی جائیں گی۔ درخواستوں کی وصولی پہلے آئیں، پہلے پائیں کی بنیاد پر ہوگی۔
