اردو رپورٹ ڈیسک
لاہور کے جنوبی چھاؤنی کے علاقے بھٹہ چوک کے قریب نجی بینک میں ہونے والی ڈکیتی کا پولیس نے سراغ لگا لیا۔ پولیس کے مطابق ملزم نے پب جی گیم میں ملنے والے مبینہ بینک ڈکیتی کے ٹاسک سے متاثر ہوکر واردات کی اور تقریباً 7 لاکھ 26 ہزار روپے نقدی لوٹ کر فرار ہوگیا۔
پولیس کے مطابق واردات 2 اکتوبر کو صبح تقریباً ساڑھے 9 بجے ہوئی اور اسے مکمل کرنے میں تقریباً 9 منٹ لگے۔ نقاب پوش ملزم کار میں بینک پہنچا، سیکیورٹی گارڈ کو اسلحے کے زور پر یرغمال بنایا اور اسے اپنے ساتھ کیش کاؤنٹر تک لے گیا۔
واردات کے دوران ملزم نے دوسرے سیکیورٹی گارڈ سے اس کا اسلحہ نیچے رکھوا دیا اور بعد ازاں کیش کاؤنٹر سے رقم لے کر فرار ہوگیا۔ پولیس کے مطابق سیکیورٹی گارڈز کے دو ہتھیار بھی ملزم اپنے ساتھ لے گیا۔
لاہور کے علاقے بھٹہ چوک میں آن لائن گیم کے زیراثر ایک نوجوان نے "پب جی" (PUBG) میں دیے گئے ٹاسک کو سچ سمجھ کر بینک لوٹ لیا۔ ملزم گیم کے کردار جیسا حلیہ، مخصوص لباس اور ماسک پہن کر بینک میں داخل ہوا اور اسلحے کے زور پر 7 لاکھ روپے چھین کر فرار ہو گیا۔ملزم گرفتار pic.twitter.com/BXdsrGEl7j
— Urdu Report (@UrduReportpk) October 3, 2026
پب جی سے متاثر ہونے کا دعویٰ
ڈی آئی جی آپریشنز فیصل کامران کے مطابق گرفتار ملزم کی شناخت سبحان کے نام سے ہوئی ہے۔ پولیس کا کہنا ہے کہ ملزم کئی برس سے پب جی کھیل رہا تھا اور واردات والے روز اسے گیم میں بینک لوٹنے سے متعلق ایک مبینہ ٹاسک ملا، جس کے بعد اس نے واردات کا منصوبہ بنایا۔
پولیس کے مطابق ملزم نے واردات کے لیے ماسک اور پستول کا انتظام کیا اور گیم میں دکھائے گئے انداز سے ملتا جلتا حلیہ اختیار کیا۔ تاہم پولیس کی جانب سے گیم کے مبینہ ٹاسک سے متعلق دعویٰ ابتدائی تفتیش کا حصہ ہے۔
گھر واپس جاکر دوبارہ گیم کھیلنے لگا
پولیس کے مطابق بینک سے رقم لوٹنے کے بعد ملزم واپس اپنے گھر پہنچا۔ مختلف رپورٹس کے مطابق اس نے لوٹی ہوئی رقم اپنے پاس رکھی، گاڑی کی نمبر پلیٹ تبدیل کی اور دوبارہ پب جی کھیلنے میں مصروف ہوگیا۔
پولیس نے سیف سٹی اور نجی کیمروں کی مدد سے ملزم کی نقل و حرکت کا سراغ لگایا اور چند منٹ کی مسافت پر واقع اس کی رہائش گاہ تک پہنچ گئی۔ پولیس کے مطابق کارروائی کے دوران ملزم کو گرفتار کرلیا گیا اور اس کے قبضے سے لوٹی گئی رقم، پستول اور دیگر سامان برآمد ہوا۔
ملزم برطانیہ سے پاکستان آیا تھا
ڈی آئی جی آپریشنز کے مطابق سبحان 16 ستمبر کو برطانیہ سے پاکستان آیا تھا اور لاہور میں اکیلا رہائش پذیر تھا جبکہ اس کے اہل خانہ برطانیہ میں مقیم تھے۔ پولیس کے مطابق ملزم کا سابقہ مجرمانہ ریکارڈ سامنے نہیں آیا۔
پولیس کا کہنا ہے کہ ملزم پاکستان آمد کے وقت 1,200 پاؤنڈ اپنے ساتھ لایا تھا، جو بعد میں خرچ ہوگئے۔ ابتدائی تفتیش کے مطابق مالی مشکلات اور اہل خانہ سے رقم کے معاملے پر اختلاف کے بعد اس نے بینک ڈکیتی کا منصوبہ بنایا۔ (Dawn)
اسلام آباد فرار ہونے کا منصوبہ
پولیس کے مطابق ملزم نے واردات کے بعد اسلام آباد فرار ہونے کا منصوبہ بھی بنایا تھا۔ اس مقصد کے لیے اس نے زیر تعمیر مکان میں گاڑی کھڑی کی تھی تاکہ گاڑی تبدیل کرکے پولیس کو چکمہ دیا جاسکے۔ تاہم پولیس نے اس منصوبے پر عمل درآمد سے پہلے ہی اسے گرفتار کرلیا۔
اسلحے سے متعلق تحقیقات
پولیس کے مطابق واردات میں استعمال ہونے والا اسلحہ بھی تفتیش کا حصہ ہے۔ بعض پولیس رپورٹس میں کہا گیا ہے کہ ملزم نے پاکستان آمد کے بعد اسلحہ خریدا تھا، جبکہ ایک رپورٹ میں اسلحہ سیالکوٹ سے خریدنے کا دعویٰ کیا گیا ہے۔
پولیس نے ملزم سے مزید تفتیش شروع کردی ہے اور واقعے کے تمام پہلوؤں کا جائزہ لیا جا رہا ہے۔
