اردو رپورٹ ڈیسک
پاکستانی اسکالرز اور پیشہ ور افراد کے لیے فل برائٹ اسکالر پروگرام 2027 کے تحت درخواستیں کھول دی گئی ہیں۔ ہائر ایجوکیشن کمیشن (ایچ ای سی) اور یونائیٹڈ اسٹیٹس ایجوکیشنل فاؤنڈیشن اِن پاکستان (یو ایس ای ایف پی) کے اشتراک سے شروع کیے گئے پروگرام کے لیے درخواستیں جمع کرانے کی آخری تاریخ 28 اکتوبر 2026 مقرر کی گئی ہے۔
امریکی حکومت کی جانب سے مالی معاونت حاصل کرنے والے اس پروگرام کے تحت منتخب اسکالرز کو امریکا کی کسی کالج یا یونیورسٹی میں 10 ماہ تک تدریس، ڈاکٹریٹ کے بعد تحقیق یا دونوں کا مجموعہ کرنے کا موقع دیا جائے گا۔ ایک زیر کفالت فرد کے مکمل اخراجات بھی پروگرام کے تحت ادا کیے جا سکتے ہیں۔
مالی معاونت میں کیا شامل ہے؟
فل برائٹ پروگرام کے تحت منتخب امیدواروں کو امریکا آنے اور واپس جانے کا ہوائی سفر، قیام کے دوران ماہانہ وظیفہ، تحقیقی اخراجات کے لیے اضافی رقم اور صحت کی انشورنس فراہم کی جائے گی۔
اس کے علاوہ امریکی ویزا درخواست کے عمل میں معاونت اور ایک زیر کفالت فرد کے مکمل اخراجات کی سہولت بھی شامل ہے۔
پاکستانی معاشرے اور ثقافت کا تعارف
فل برائٹ اسکالرز سے توقع کی جاتی ہے کہ وہ امریکا میں طلبہ، ساتھی اساتذہ اور مختلف کمیونٹی گروپس کے ساتھ پاکستانی معاشرے اور ثقافت کے بارے میں معلومات شیئر کریں گے۔
پاکستان واپسی کے بعد اسکالرز سے یہ بھی توقع کی جاتی ہے کہ وہ ملک کی ترقی میں اپنا کردار ادا کریں گے اور امریکا میں حاصل ہونے والے تجربات کو مقامی برادریوں کے ساتھ شیئر کریں گے۔
کون درخواست دے سکتا ہے؟
تمام تعلیمی شعبوں سے تعلق رکھنے والے امیدوار درخواست دے سکتے ہیں، تاہم طبی شعبے سے وابستہ امیدوار اس پروگرام کے لیے اہل نہیں ہوں گے۔
امیدوار کے پاس اپنے متعلقہ شعبے میں پی ایچ ڈی یا اعلیٰ ترین پیشہ ورانہ ڈگری ہونا ضروری ہے۔ اس کے علاوہ تحریری اور بول چال کی انگریزی پر بہترین عبور بھی لازمی قرار دیا گیا ہے۔
درخواست گزار کو امریکا میں کیے جانے والے مجوزہ کام اور پاکستان میں اپنے پیشہ ورانہ کام سے اس کی مطابقت پر مبنی واضح اور جامع تحقیقی منصوبہ پیش کرنا ہوگا۔ تدریسی پروگرام کے لیے درخواست دینے والے امیدوار کے پاس یونیورسٹی سطح پر تدریس کا تجربہ بھی ہونا چاہیے۔
درخواست میں تحقیقی منصوبے کو سب سے اہم حصہ قرار دیا گیا ہے۔
پروگرام کی اہم تفصیلات
پروگرام: فل برائٹ اسکالر پروگرام 2027
مالی معاونت کی مدت: 10 ماہ تک
تحقیق یا تدریس کا آغاز: خزاں 2027
درخواست کی آخری تاریخ: 28 اکتوبر 2026
اہل امیدوار: پاکستانی اسکالرز اور پیشہ ور افراد
درخواست کا طریقہ: آن لائن
کون امیدوار اہل نہیں ہوگا؟
وہ امیدوار درخواست دینے کے اہل نہیں ہوں گے جنہوں نے گزشتہ دو سال کے دوران پی ایچ ڈی مکمل کی ہو۔
اسی طرح گزشتہ پانچ سال کے دوران امریکا میں تحقیق یا کسی طویل مدتی تعلیمی پروگرام میں شرکت کرنے والے امیدوار بھی اہل نہیں ہوں گے۔
دوہری امریکی اور پاکستانی شہریت رکھنے والے افراد، ایسے امیدوار جن کے شریک حیات، والدین یا 18 سال سے زائد عمر کے بچے امریکی شہری یا مستقل رہائشی ہوں، بھی اس پروگرام کے لیے اہل نہیں ہوں گے۔
یو ایس ای ایف پی یا امریکی محکمہ خارجہ کے ملازمین اور ان کے زیر کفالت افراد بھی درخواست نہیں دے سکتے۔ اس کے علاوہ امریکا میں زیر تعلیم افراد یا کسی دوسرے ملک کا کام یا رہائش کا ویزا رکھنے والے امیدوار بھی نااہل قرار دیے جائیں گے۔
درخواست کیسے جمع کرائی جائے؟
مکمل درخواست میں درخواست فارم، تین سفارشی خطوط اور دعوت نامہ یا دعوت نامے شامل ہونا ضروری ہیں۔
امیدوار تمام مطلوبہ دستاویزات کے ساتھ اپنی مکمل درخواست آن لائن جمع کرا سکتے ہیں۔ کاغذی درخواستیں قبول نہیں کی جائیں گی۔
درخواستیں یو ایس ای ایف پی کی ویب سائٹ پر جمع کرائی جائیں گی اور آخری تاریخ 28 اکتوبر 2026 ہے۔
