وسیم اکرم کی ڈراموں میں انٹری، سینیر اداکارہ کے ساتھ نظر آئیں گے

اردو رپورٹ ڈیسک

پاکستان کرکٹ ٹیم کے سابق کپتان اور مایہ ناز فاسٹ بولر وسیم اکرم جلد ٹیلی ویژن ڈراموں میں اداکاری کرتے نظر آ سکتے ہیں۔ اطلاعات کے مطابق وہ ایک نئے ڈرامے میں اداکارہ ماہ نور بلوچ کے ساتھ کام کریں گے، جس کی ہدایات فہیم برنی دیں گے۔

ڈرامے کے ہدایت کار فہیم برنی نے اپنے انسٹاگرام اکاؤنٹ پر بھی اس منصوبے سے متعلق معلومات شیئر کی ہیں، جس کے بعد سوشل میڈیا پر اس حوالے سے گفتگو شروع ہوگئی ہے۔

ڈرامہ ابھی تیاری کے ابتدائی مراحل میں ہے اور اس کی دیگر کاسٹ کو حتمی شکل دینے کے لیے بات چیت جاری ہے۔

ماہرہ خان کی خصوصی شرکت کا امکان

رپورٹس کے مطابق ڈرامے کی انتظامیہ معروف اداکارہ ماہرہ خان سے بھی خصوصی کردار کے لیے رابطہ کرنے پر غور کر رہی ہے۔

ماہرہ خان متعدد پاکستانی فلموں اور ڈراموں میں کام کر چکی ہیں۔ وہ بالی وڈ فلم ’’رئیس‘‘ میں بھی اداکاری کے جوہر دکھا چکی ہیں۔

تاہم اس نئے ڈرامے میں ان کی شرکت کی تاحال باضابطہ تصدیق نہیں ہوئی۔ ڈرامے کی مکمل کاسٹ، کہانی اور ریلیز کی تاریخ کے بارے میں بھی تفصیلات سامنے نہیں آئیں۔

سوشل میڈیا پر ملے جلے ردعمل کا اظہار

وسیم اکرم کی ڈراموں میں ممکنہ آمد پر سوشل میڈیا صارفین کی جانب سے ملے جلے ردعمل کا اظہار کیا جا رہا ہے۔ بعض مداح انہیں اداکاری کرتے دیکھنے کے لیے پُرجوش ہیں، جبکہ کچھ صارفین کا خیال ہے کہ کھلاڑیوں کو اپنے شعبے تک محدود رہنا چاہیے۔

ٹیلی ویژن ناقد ڈاکٹر اعجاز وارث نے ممکنہ کاسٹ پر تنقید کرتے ہوئے تبصرہ کیا کہ ٹی وی اداکاروں کو گھر بیٹھ جانا چاہیے اور کرکٹرز کو اداکاری شروع کر دینی چاہیے۔

اداکارہ جویریہ عباسی ممکنہ جوڑی پر خوشی کا اظہار کیا۔

ایک پاکستانی سوشل میڈیا صارف نے مزاحیہ انداز میں لکھا کہ انہیں وسیم اکرم کو اشتہارات میں دیکھ کر ہی مشکل سے برداشت کرنا پڑتا تھا اور اب انہیں ڈراموں میں بھی دیکھنا پڑے گا۔

تنقید کے باوجود وسیم اکرم کے متعدد مداح ان کے نئے انداز کو دیکھنے کے منتظر ہیں۔

وسیم اکرم کا شاندار کرکٹ کیریئر

وسیم اکرم کا شمار کرکٹ کی تاریخ کے بہترین بائیں ہاتھ کے فاسٹ بولرز میں ہوتا ہے۔ انہوں نے اپنے شاندار کیریئر کے دوران ایک روزہ بین الاقوامی میچوں میں 500 سے زیادہ وکٹیں حاصل کیں۔

وہ 1992 میں عالمی کپ جیتنے والی پاکستانی ٹیم کا بھی حصہ تھے۔ کرکٹ سے ریٹائرمنٹ کے بعد انہوں نے بطور مبصر اور کرکٹ تجزیہ کار اپنی سرگرمیاں جاری رکھیں اور تفریحی دنیا میں بھی کام کیا۔

فلموں اور ٹیلی ویژن پروگراموں میں بھی کام کر چکے ہیں

وسیم اکرم اس سے قبل بھی فلموں اور تفریحی پروگراموں میں دکھائی دے چکے ہیں۔ ان کی فلمی شرکت میں 2011 کی فلم ’’کچڑی‘‘، 2017 کی فلم ’’سچن: اے بلین ڈریمز‘‘ اور 2023 کی پاکستانی فلم ’’منی بیک گارنٹی‘‘ شامل ہیں۔

اس کے علاوہ وہ بھارتی مزاحیہ پروگراموں ’’کامیڈی نائٹس ود کپل‘‘ اور ’’دی کپل شرما شو‘‘ میں بھی شرکت کر چکے ہیں۔

وسیم اکرم مختلف پروگراموں میں میزبان اور جج کے طور پر بھی کام کر چکے ہیں۔ اب نئے ڈرامے میں ان کی ممکنہ شرکت ان کے فنی سفر میں ایک اور قدم ثابت ہوسکتی ہے۔