وفاقی وزیر برائے مذہبی امور سردار محمد یوسف نے ہدایت کی ہے کہ منیٰ اور عرفات کے مکاتب سمیت مشاعر مقدسہ کے انتظامات بروقت مکمل کیے جائیں۔
وفاقی وزیر سردار یوسف کی زیر صدارت حج انتظامات کا ایک اعلیٰ سطحی جائزہ اجلاس منعقد ہوا جس میں آئندہ حج سیزن کی تیاریوں پر تفصیلی غور کیا گیا۔
اجلاس میں وفاقی سیکرٹری مذہبی امور ڈاکٹر ساجد محمود چوہان، ڈی جی حج عبدالوہاب سومرو اور حج ونگ کے سینئر افسران نے شرکت کی اور جاری انتظامات پر بریفنگ دی۔
اجلاس سے خطاب کرتے ہوئے سردار محمد یوسف نے ہدایت کی کہ حجاج کرام کے لیے پاکستان اور سعودی عرب میں مثالی اور مربوط انتظامات یقینی بنائے جائیں۔
انہوں نے کہا کہ عازمین حج اور خدام الحجاج اپنے مثبت طرز عمل اور بہترین نظم و ضبط کے ذریعے ملک کے وقار میں اضافہ کریں۔
ان کا کہنا تھا کہ حجاج کرام کی قدم بہ قدم رہنمائی اور خدمت میں کسی قسم کی کوتاہی برداشت نہیں کی جائے گی۔
وفاقی سیکرٹری مذہبی امور ڈاکٹر ساجد محمود چوہان نے بریفنگ دیتے ہوئے بتایا کہ عازمین حج اور خدام الحجاج کی لازمی تربیت کا پہلا مرحلہ کامیابی سے مکمل کر لیا گیا ہے۔
ملک کے 107 شہروں میں 183 تربیتی ورکشاپس کے ذریعے عازمین کو مناسک حج، سفری امور اور انتظامی رہنمائی فراہم کی گئی۔
انہوں نے مزید بتایا کہ ایک روزہ تربیتی پروگرام کا دوسرا مرحلہ عید الفطر کے فوری بعد شروع کیا جائے گا۔
سیکرٹری مذہبی امور کے مطابق رواں سال عازمین حج کے لیے ویکسین کی فراہمی، فضائی ٹکٹوں کا اجراء اور ویزا پراسیسنگ کا عمل جلد شروع کر دیا جائے گا تاکہ حجاج کو کسی قسم کی پریشانی کا سامنا نہ ہو۔
ڈی جی حج عبدالوہاب سومرو نے اجلاس کو آگاہ کیا کہ مکہ مکرمہ اور مدینہ منورہ میں رہائش گاہیں گزشتہ برس کے مقابلے میں بہتر معیار کی حاصل کی گئی ہیں۔
انہوں نے بتایا کہ ٹرانسپورٹ، منیٰ کے خیموں، مشاعر اور خوراک کے انتظامات حتمی مراحل میں داخل ہو چکے ہیں۔
وفاقی وزیر نے خصوصی طور پر ہدایت کی کہ منیٰ اور عرفات کے مکاتب سمیت مشاعر مقدسہ کے انتظامات بروقت مکمل کیے جائیں اور ہر مرحلے پر مانیٹرنگ کا مؤثر نظام یقینی بنایا جائے۔
انہوں نے کہا کہ عازمین حج کو ایک منظم، باوقار اور سہل حج تجربہ فراہم کیا جا سکے۔
یہ بھی پڑھئِے
