سینئر اداکار، پروڈیوسر اور ہدایت کار یاسر نواز کے حالیہ بیان نے شوبز حلقوں میں ایک بار پھر توجہ حاصل کر لی ہے، جو انہوں نے معروف اداکارہ علیزے شاہ سے متعلق دیا۔
رمضان ٹرانسمیشن کے دوران میزبان جویریہ سعود نے یاسر نواز سے سوال کیا کہ اگر وہ علیزے شاہ کو کسی ڈرامے میں کاسٹ کریں تو انہیں کس کردار میں دیکھنا چاہیں گے۔ اس پر یاسر نواز نے مثبت ردعمل دیتے ہوئے کہا کہ علیزے شاہ باصلاحیت اداکارہ ہیں اور وہ انہیں مرکزی کردار یعنی ہیروئن کے طور پر کاسٹ کرنا پسند کریں گے۔
یاد رہے کہ چند ماہ قبل علیزے شاہ نے یاسر نواز اور گلوکارہ شازیہ منظور کو خبردار کیا تھا کہ وہ ٹی وی پروگرامز میں ان کے بارے میں بات کرنے سے گریز کریں، بصورت دیگر وہ قانونی کارروائی کریں گی۔ اداکارہ کا کہنا تھا کہ اگر یہ سلسلہ جاری رہا تو وہ ان وجوہات کو بھی سامنے لا سکتی ہیں جن کی وجہ سے ان کے ساتھ کام نہیں کیا جا رہا۔
تاہم بعد ازاں رمضان کے آغاز پر علیزے شاہ نے ایک مثبت قدم اٹھاتے ہوئے اپنے بیان میں سینئر فنکاروں کو معاف کرنے کا اعلان کیا، جسے شوبز انڈسٹری میں خوش آئند قرار دیا گیا۔
دوسری جانب، ماضی میں یاسر نواز نے ایک ٹی وی شو میں علیزے شاہ کے ساتھ کام کرنے کے تجربے کو ناخوشگوار قرار دیا تھا، جبکہ ان کی اہلیہ ندا یاسر نے بھی اسی پروگرام میں اس مؤقف کی تائید کی تھی۔
بعد ازاں یاسر نواز نے اپنے اس بیان پر معذرت کرتے ہوئے علیزے شاہ کے ساتھ دوبارہ کام کرنے کی خواہش کا اظہار کیا، اور اب ان کا حالیہ بیان دونوں کے درمیان تعلقات میں بہتری کی جانب اشارہ سمجھا جا رہا ہے۔
یہ بھی پڑھئِے
