اردو رپورٹ ڈیسک
پاکستان کی پہلی چاند گاڑی ’’جناح ون‘‘ 2028 میں چاند پر اترنے کی توقع ہے۔ چیئرمین سپارکو یوسف خان نے ملک کے خلائی پروگرام میں ہونے والی حالیہ پیش رفت سے آگاہ کرتے ہوئے بتایا کہ پاکستان اب یورپی اور چینی سیٹلائٹس پر انحصار کرنے کے بجائے اپنی سیٹلائٹس استعمال کر رہا ہے۔
ورلڈ اسپیس ویک کی تقریب سے خطاب کرتے ہوئے یوسف خان نے کہا کہ نوجوانوں کو خلائی ٹیکنالوجی سے روشناس کرانے میں ورلڈ اسپیس ویک اہم کردار ادا کرتا ہے۔
انہوں نے کہا کہ گزشتہ چند برسوں کے دوران پاکستان کے خلائی پروگرام میں نمایاں پیش رفت ہوئی ہے اور ملک نے اپنی سیٹلائٹ صلاحیتوں میں اضافہ کیا ہے، جنہیں مختلف شعبوں میں استعمال کیا جا رہا ہے۔
سیٹلائٹس کی حالیہ لانچنگ
چیئرمین سپارکو کے مطابق پاکستان نے جنوری 2025 میں اپنا ای-1 سیٹلائٹ خلا میں بھیجا، جس کے بعد جولائی اور اکتوبر 2025 میں مزید دو سیٹلائٹس خلا میں بھیجے گئے۔
یوسف خان نے بتایا کہ پاکستان کے پاس اس وقت زمین کے مشاہدے کے لیے چھ سیٹلائٹس موجود ہیں، جو مختلف شعبوں میں معاونت فراہم کر رہے ہیں۔
زراعت اور قدرتی آفات میں معاونت
چیئرمین سپارکو نے کہا کہ زمین کے مشاہدے کے لیے استعمال ہونے والے یہ سیٹلائٹس زراعت، منصوبہ بندی اور قدرتی آفات سے نمٹنے سمیت مختلف شعبوں میں معاونت فراہم کر رہے ہیں۔
ان کے مطابق سیٹلائٹ ٹیکنالوجی کو پاکستان میں انٹرنیٹ اور ٹیلی ویژن کی کوریج بڑھانے کے لیے بھی استعمال کیا جا رہا ہے۔
