وزیراعظم اور صدر کا خیبرپختونخوا میں ایمرجنسی نافذ کرنے پر اتفاق، ذرائع

اردو رپورٹ ڈیسک

وزیراعظم شہباز شریف اور صدر مملکت آصف علی زرداری نے خیبرپختونخوا میں ایمرجنسی نافذ کرنے پر اتفاق کر لیا ہے۔ ذرائع کے مطابق یہ اتفاق ایوان صدر میں ہونے والی ملاقات کے دوران کیا گیا۔

ذرائع کا کہنا ہے کہ گورنر خیبرپختونخوا فیصل کریم کنڈی کی رپورٹ موصول ہونے کے بعد صدر مملکت آصف علی زرداری اپنا اختیار استعمال کریں گے۔

وفاقی کابینہ کا اجلاس طلب

ذرائع کے مطابق وفاقی کابینہ کا اجلاس اتوار 11 اکتوبر کو صبح ساڑھے 9 بجے طلب کیا گیا ہے، جس میں خیبرپختونخوا میں ایمرجنسی نافذ کرنے کی منظوری دیے جانے کا امکان ہے۔

ایمرجنسی کے نفاذ سے متعلق آئندہ کارروائی گورنر کی رپورٹ موصول ہونے اور صدر مملکت کی جانب سے اختیار استعمال کیے جانے سے مشروط ہے۔

ملکی سیاسی اور سیکیورٹی صورت حال پر تبادلہ خیال

ایوان صدر میں ہونے والی ملاقات کے بعد جاری اعلامیے کے مطابق وزیراعظم شہباز شریف اور صدر آصف علی زرداری نے ملک کی مجموعی سیاسی اور سیکیورٹی صورت حال پر تبادلہ خیال کیا۔

ملاقات میں منگل 13 اکتوبر کو قومی اسمبلی اور سینیٹ کے الگ الگ اجلاس بلانے پر بھی اتفاق کیا گیا۔

ملاقات میں اہم حکومتی رہنماؤں کی شرکت

ملاقات میں نائب وزیراعظم اسحاق ڈار، رانا ثناء اللہ، وزیر داخلہ محسن نقوی، وزیر قانون اعظم نذیر تارڑ، احد چیمہ، اٹارنی جنرل منصور عثمان اعوان، شیری رحمان، نوید قمر، سلیم مانڈوی والا اور ڈاکٹر عاصم نے شرکت کی۔

شہباز شریف کا مولانا فضل الرحمان سے ٹیلی فونک رابطہ

دوسری جانب وزیراعظم شہباز شریف نے اس سے قبل جمعیت علمائے اسلام (ف) کے سربراہ مولانا فضل الرحمان سے ٹیلی فون پر رابطہ کیا اور انہیں ملاقات کی دعوت دی۔