وزیر اعلیٰ خیبر پختونخواہ سہیل آفریدی نے پشاور جلسے سے خطاب کر تے ہوئے کہا کہ ایک پارٹی کے دو جعلی وزرا اور ایک ادارے کے ڈی جی میں فرق ہونا چاہیے۔ آپ نے مجھے عمران خان کی وجہ سے عزت دی، جس پر سب کا شکر گزار ہوں۔
اس موقع پر کارکنوں کے ڈی چوک جانے کے نعرے کا جواب دیتے ہوئے سہیل آفریدی نے کہاکہ میں بہت جلد ڈی چوک جانے کی کال دوں گا۔
اتوار کو پشاور میں پاکستان تحریک انصاف کے جلسے سے خطاب کرتے ہوئے وزیراعلیٰ خیبر پختونخوا سہیل آفریدی نے فوج کے ترجمان لیفٹیننٹ جنرل احمد شریف چوہدری کی حالیہ پریس کانفرنس کا جواب دیا ہے۔
انھوں نے کہا کہ ’ایک ادارے کا ڈی جی آ کر پریس کانفرنس کرتا ہے اور میرے بارے میں غلط الفاظ استعمال کرتا ہے، میں غیور پختون قبائلی ہوں، میری تربیت ایسی نہیں ہے کہ میں گالیاں دوں۔انہو ں نے کہا کہ ‘اس کا، اُس کا، اُس کی۔۔۔ یہ سب کیا ہے؟ تم نام کیوں نہیں لیتے؟ عمران خان نیازی کا نام یاد رکھنا۔
یہ بھی پڑھئیں
نو مئی واقعات میں عمران خان،شاہ محمود قریشی سمیت دیگر کے نام ای سی ایل میں شامل – urdureport.com
وزیر اعلیٰ نے کہا کہ ’ایک ادارے کے ڈی جی اور ایک جعلی سینیٹر میں فرق ہونا چاہیے۔ ایک پارٹی کے دو جعلی وزرا اور ایک ادارے کے ڈی جی میں فرق ہونا چاہیے۔ نہ آپ ایک جعلی سینیٹر ہیں اور نہ آپ کسی پارٹی کے ترجمان ہیں۔‘
سہیل آفریدی نے جلسہ عام سے خطاب میں کہا کہ ’میرے بڑوں نے مجھے ملک اور اس کے اداروں سے محبت سکھائی ہے۔‘خیبر پختونخوا کے وزیر اعلیٰ نے کہا کہ ’اگر 21 سال میں آپ کی پالیسی کامیاب نہیں ہو رہی ہے تو قصور آپ کا ہے، آپ اپنی پالیسی بدلیں۔‘انھوں نے کہا کہ ’ہم تنقید برائے تنقید نہیں کرتے بلکہ حل بھی بتاتے ہیں۔‘
اپنے خطاب میں سہیل آفریدی نے کہا کہ ’کہا جاتا ہے کہ سکیورٹی پالیسی نہیں ہے۔ 21 برس سے آپریشن پر آپریشن، ڈرون پر ڈرون چل رہے ہیں۔ 21 سال سے میرے پختون کا خون بہہ رہا ہے، 21 سال سے میرا پختون پاکستان اور پاکستانیوں کے لیے اپنی جانوں کا نذرانہ دے رہا ہے۔‘
وزیر اعلیٰ نے موجودہ سکیورٹی پالیسی پر تنقید کرتے ہوئے کہا کہ ’ہر آنے والا بندہ ایک نئی پالیسی بناتا ہے اور ایک نیا تجربہ کرتا ہے۔ یہ غیور عوام کا صوبہ خیبر پختونخوا ہے، کوئی لیبارٹری نہیں ہے۔‘انھوں نے کہا کہ ’اب ایک پالیسی بنے گی، یہ صوبے کے عوام بنائیں گے اور وہی پالیسی چلے گی۔‘
انھوں نے کہا کہ ’ہماری ان باتوں سے تکلیف پہنچتی ہے، ان کو تکلیف ہوتی ہے تو ہم تکلیف پہنچائیں گے۔ جو پاکستان کے مفاد میں نہیں ہوگا، یہ ہمیں کوئی ڈکٹیٹ نہیں کرے گا، فیصلہ عوام کریں گے۔‘
وزیر اعلیٰ نے کہا کہ ’ہم پر کیا تنقید کر رہے ہو، ہماری تربیت یہ ہے کہ ملک کی خاطر اگر جان و مال قربان کرنا پڑے تو دریغ نہیں کرنا۔ اسی لیے ہم نے 80 ہزار سے زیادہ جانوں کا نذرانہ پیش کیا ہے۔ اس پاکستان کو خوشحال دیکھنے کے لیے قربانیاں دی ہیں۔‘
پشاور کے جلسے میں وزیر اعلیٰ خیبر پختونخوا سہیل آفریدی کے خطاب سے قبل قومی ترانہ بجایا گیا۔ سہیل آفریدی نے اپنے خطاب کا آغاز پشتو کے ایک شعر سے کیا، جس پر جلسے میں نعرے بازی شروع ہو گئی۔انھوں نے اپنے خطاب میں پشاور کے لیے سو ارب روپے کے پیکج کا بھی اعلان کیا۔
اس کے بعد سہیل آفریدی نے کہا کہ ’یہ کہا جاتا ہے کہ خیبر پختونخوا میں گورننس نہیں ہے۔ خیبر پختونخوا میں گورننس ہے تو عوام تیسری مرتبہ عمران خان کو ووٹ دے رہے ہیں۔‘
سہیل آفریدی نے کہا کہ ’گورننس تو ان کی نہیں ہے جنھیں اب آئی ایم ایف نے چارج شیٹ کیا ہے کہ اشرافیہ نے عوام کے ٹیکسز میں سے پانچ ہزار تین سو ارب روپے کی کرپشن کی ہے۔‘
انھوں نے کہا کہ ’کچھ سیاسی نابالغ ہمیں کہتے ہیں کہ آپ صرف عمران خان کی بات کر رہے ہیں۔‘ اس کے بعد وزیر اعلیٰ نے عمران خان کے حق میں نعرے لگوائے اور کہا کہ ’جہاں تک میری ذات کی بات ہے تو مجھ پر جو الزامات لگے وہ آپ نے سنے۔ مجھے کبھی ایک نام سے پکارا گیا، کبھی دوسرے نام سے۔ میں علامہ محمد اقبال کا شاہین ہوں۔ کچھ کوے اگر مجھے چونچ ماریں گے تو میں نے پرواز اونچی کرنی ہے، میں نے کوے سے نہیں لڑنا، یہ سیاسی کوے ہمارا کچھ نہیں بگاڑ سکتے۔‘
وزیر اعلیٰ نے کہا کہ ’عمران خان خیبر پختونخوا میں بھی ہے، پنجاب میں بھی ہے، سندھ میں بھی ہے، بلوچستان میں بھی ہے، کشمیر اور گلگت بلتستان میں بھی ہے اور عمران خان بیرونِ ملک بھی ہے۔‘انھوں نے کہا کہ ’میں اپنی حد تک تو کچھ نہیں کہتا مگر جب بات عمران خان کی آئے گی تو پھر جواب دیا جائے گا۔‘سہیل آفریدی نے کہا کہ ’آزاد عدلیہ، آزاد میڈیا اور آئین کی بحالی کے لیے ہماری جدوجہد جاری رہے گی۔‘
وزیر اعلیٰ نے کہا کہ ’ان لوگوں کو مشورہ دینے والا کچھ سمجھتا بھی ہے یا نہیں، وہ جو مشورہ دیتا ہے سب اس کے الٹ ہو جاتا ہے۔ عوام ان سے اور منحرف ہو جاتے ہیں۔ یہ مجمع اس بات کی گواہی ہے کہ عوام عمران خان کے ساتھ کھڑے ہیں۔‘انھوں نے کہا کہ ’جہاں باہر جا کر آپ جن کے بوٹ پالش کرتے ہیں وہ عمران خان کو جھک کر سیلوٹ کرتے ہیں۔‘
علامہ ناصر عباس رہنما تحریک تحفظ آئین پاکستان نے کہا کہ”ڈی جی، آئی ایس پی آر کا ایک ایک جملہ بتا رہا تھا کہ یہ سہمے ڈرے ہوئے، اندر سے ٹوٹے ہوئے اور ہارے ہوئے لوگ ہیں۔ ہمارا مقابلہ ان ذہنی مریضوں سے ہے، ڈی جی آئی ایس پی آر کی تمام باتیں درست ہو سکتی ہیں اگر عمران خان کے نام کی جگہ ان مسلط ڈاکوؤں کا نام لکھا جائے۔“
