پاکستان نے تین ٹی ٹوئنٹی پر مشتمل سیریز کے پہلے میچ میں آسٹریلیا کو 22 رنز سے شکست دے دی۔
لاہور میں کھیلے گئے میچ میں پاکستان نے آسٹریلیا کے خلاف ٹاس جیت کر بیٹنگ کا فیصلہ کیا اور مقررہ 20 اوورز میں 8 وکٹوں کے نقصان پر 168 رنز بنائے۔
پاکستان کی جانب سے صائم ایوب 40، سلمان علی آغا 39 اور بابر اعظم 24 رنز کے ساتھ نمایاں رہے۔ عثمان خان نے 18، فخر زمان نے 10 رنز کی اننگز کھیلی جبکہ محمد نواز 15 رن بنا کر ناقابل شکست رہے۔
آسٹریلیا کی جانب سے ایڈم زمپا 24 رنز کے عوض 4 وکٹیں لے کر نمایاں بولر رہے۔
ہدف کے تعاقب میں آسٹریلوی ٹیم مقررہ 20 اوورز میں 8 وکٹوں کے نقصان پر 146 رنز بناسکی۔
کیمرون گرین 36 رنز بنا کر ٹاپ اسکورر رہے جبکہ زاویئر بارٹلے 34 رنز کے ساتھ ناقابلِ شکست رہے اور کپتان ٹریوس ہیڈ نے 23 رنز کی اننگز کھیلی۔
ٹی ٹوئنٹی ورلڈ کپ 2026 کی تیاریوں کے سلسلے میں پاکستان اور آسٹریلیا کے درمیان تین میچوں کی ٹی ٹوئنٹی سیریز کا آغاز آج ہوا۔
سیریز کا پہلا ٹی ٹوئنٹی انٹرنیشنل میچ قذافی اسٹیڈیم لاہور میں کھیلا گیا، جہاں دونوں ٹیمیں ورلڈ کپ سے قبل اپنی حکمت عملیوں کو آزمایا۔
آسٹریلوی ٹیم بدھ کی صبح لاہور پہنچی۔ ٹیم کی آمد کے بعد دونوں کپتانوں سلمان علی آغا اور مچل مارش نے سیریز کی چمکدار ٹرافی کی رونمائی کی۔
اس موقع پر منعقدہ پریس کانفرنس میں کپتانوں نے سیریز کی اہمیت پر روشنی ڈالی اور اپنی تیاریوں کے بارے میں بات کی۔
پاکستان کے کپتان سلمان علی آغا نے کہا کہ ٹیم کے ہر کھلاڑی کو اپنا رول بخوبی معلوم ہے۔ “ہم ٹیم کی ضرورت اور رن ریٹ کے مطابق کھیلنے پر توجہ دیں گے۔”
انہوں نے مزید کہا کہ پچز کو سری لنکا جیسا بنانے کی کوشش کی گئی ہے تاکہ کھلاڑی اپنی صلاحیتوں کے مطابق بہترین کارکردگی دکھا سکیں۔ “اگر کھلاڑی اپنی صلاحیت کے مطابق کھیلیں تو ہم سیریز جیت سکتے ہیں۔”
آسٹریلوی کپتان مچل مارش نے پاکستان کی ٹیم کی تعریف کرتے ہوئے کہا کہ شاہین شاہ آفریدی ایک شاندار بولر ہیں جو ان کے لیے بہت چیلنجنگ ثابت ہو سکتے ہیں۔ “یہ سیریز بہت اچھی ہو گی۔”
انہوں نے اپنے کھیلنے کے بارے میں کہا کہ وہ آج رات یا کل تک فیصلہ کریں گے۔ مارش نے بتایا کہ ٹیم نے اسپنرز پر حملہ کرنے کا پلان بنایا ہے، کنڈیشنز چیلنجنگ ہوں گی، لیکن ان کے پاس ورلڈ کپ اسکواڈ کے زیادہ تر کھلاڑی موجود ہیں۔
یہ بھی پڑھئیے
بنگلادیش ٹی 20 ورلڈ کپ 2026ء سے آوٹ اسکاٹ لینڈ ان ، زیادتی ہوئی پاکستان – urdureport.com
https://urdureport.com/category/sports
یہ تین میچوں کی سیریز ٹی ٹوئنٹی ورلڈ کپ (جو بھارت اور سری لنکا میں 7 فروری سے شروع ہو رہی ہے) سے قبل دونوں ٹیموں کے لیے بہترین تیاری کا موقع فراہم کرے گی۔ تمام میچز قذافی اسٹیڈیم لاہور میں ہی کھیلے جائیں گے، جہاں دوسرا میچ 31 جنوری اور تیسرا یکم فروری کو شیڈول ہے۔
دونوں ٹیمیں اس سیریز کو نہ صرف جیتنے بلکہ اپنی کمزوریوں کو دور کرنے اور بہترین کمبینیشن تلاش کرنے کے لیے استعمال کر رہی ہیں۔ شائقین کرکٹ کے لیے یہ سیریز دلچسپ مقابلوں کا وعدہ کر رہی ہے۔ میچ کی لائیو کوریج مختلف چینلز اور پلیٹ فارمز پر دستیاب ہو گی۔
