امریکی محکمہ دفاع پینٹاگون نے ایک ایسا قدم اٹھایا ہے جس نے دنیا بھر میں سنسنی پھیلا دی ہے۔ برسوں تک خفیہ رکھے جانے والے یو ایف اوز UFO (Unidentified Flying Object) یعنی پراسرار اڑن طشتریوں Flying Saucer سے متعلق درجنوں دستاویزات پہلی بار عوام کے سامنے لائی گئی ہیں، جن میں بعض رپورٹس دوسری جنگِ عظیم کے بعد کے دور تک جا پہنچتی ہیں۔
یوں پینٹاگون کی ان فائلوں نے اگرچہ دنیا بھر میں نئی بحث چھیڑ دی ہے، مگر سب سے بڑا سوال اب بھی برقرار ہے:
کیا یہ محض انسانی ٹیکنالوجی ہے یا واقعی کائنات میں ہم اکیلے نہیں؟
ان دستاویزات کے منظرِ عام پر آنے کے بعد ایک بار پھر یہ سوال شدت سے اٹھنے لگا ہے کہ کیا واقعی امریکی حکومت دہائیوں سے کسی بڑے راز پر پردہ ڈالتی رہی؟
ا
امریکی وزیر دفاع پیٹ ہیگسیتھ نے فائلوں کے اجرا کو ’شفافیت کی جانب تاریخی قدم‘ قرار دیتے ہوئے کہا کہ برسوں سے ان ریکارڈز کو خفیہ رکھا گیا، جس سے قیاس آرائیوں اور سازشی نظریات کو تقویت ملی، مگر اب امریکی عوام خود حقیقت جان سکیں گے۔
پینٹاگون کی ویب سائٹ پر جاری کی گئی 160 سے زائد فائلوں میں حیران کن انکشافات درج ہیں۔ ایک رپورٹ دسمبر 1947 کی ہے جس میں ’فلائنگ ڈسکس‘ دیکھے جانے کے متعدد واقعات کا ذکر ہے، جبکہ 1948 کی ایک انتہائی خفیہ فضائیہ انٹیلی جنس رپورٹ میں نامعلوم طیاروں اور اڑن طشتریوں کی پراسرار سرگرمیوں کا حوالہ دیا گیا ہے۔
چونکا دینے والا واقعہ
سب سے چونکا دینے والی تفصیل 2023 کے ایک واقعے کی ہے، جس میں امریکی قانون نافذ کرنے والے اداروں کے تین اہلکاروں نے آسمان پر نارنجی چمکتے دائروں کو دیکھنے کا دعویٰ کیا۔ ان کے مطابق ان دائروں سے اچانک سرخ رنگ کے چھوٹے گولے خارج ہوئے جو چند لمحوں میں غائب ہو گئے۔
یہ پیش رفت اس وقت سامنے آئی ہے جب امریکی صدر ڈونلڈ ٹرمپ نے چند ماہ قبل وفاقی اداروں کو حکم دیا تھا کہ یو ایف اوز اور خلائی مخلوق UFOsسے متعلق تمام خفیہ ریکارڈز کی نشاندہی کرکے انہیں عوام کے لیے جاری کیا جائے۔
باراک اوبامہ کا دعویٰ
دلچسپ بات یہ ہے کہ ٹرمپ نے سابق صدر براک اوباما کے ایک پرانے بیان کا حوالہ دیتے ہوئے دعویٰ کیا تھا کہ امریکی حکومت کے پاس ایسی معلومات موجود ہیں جو عام لوگوں سے پوشیدہ رکھی گئیں۔ اوباما نے ایک پوڈکاسٹ میں پراسرار انداز میں کہا تھا: ’’وہ حقیقی ہیں، مگر میں نے انہیں نہیں دیکھا۔‘‘
مذید پڑھئِے
تاج برطانیہ میں جڑا کوہِ نور ہیرے کا سفر: اصل حقدار کون سا ملک؟ – urdureport.com
صدر ٹرمپ کا وائٹ ہاوس کی تاریخی عمارت میں بال روم کا منصوبہ متنازع کیوں؟ – urdureport.com
تاہم ان تمام سنسنی خیز دعوؤں کے باوجود پینٹاگون نے واضح کیا ہے کہ جاری شدہ فائلوں میں ایسا کوئی ناقابلِ تردید ثبوت موجود نہیں جو یہ ثابت کرے کہ یہ واقعات خلائی مخلوق یا زمین سے باہر ذہین حیات سے جڑے ہیں۔
ماہرین کی رائے
ماہرین کے مطابق بیشتر واقعات کی ممکنہ وضاحت موسمی غباروں، خفیہ فوجی ٹیکنالوجی، جاسوس طیاروں یا سیٹلائٹس سے ہو سکتی ہے، لیکن کئی کیسز اب بھی ایسے ہیں جن کی کوئی حتمی وضاحت سامنے نہیں آسکی۔
