اردو رپورٹ ڈیسک
مقبوضہ جموں و کشمیر کے ضلع ڈوڈہ میں 21 سالہ لڑکی پائل دیوی کے مبینہ طور پر دریائے چناب میں کودنے کے واقعے کے بعد پولیس اور ریسکیو ٹیموں نے تلاش کا آپریشن شروع کردیا، تاہم تاحال لڑکی کا سراغ نہیں مل سکا۔
یہ واقعہ ہفتے کے روز تقریباً 2 بجے پریمنگر کے قریب شیوا دل پل پر پیش آیا۔ مقامی ذرائع کے مطابق واقعے کی ایک ویڈیو بھی سوشل میڈیا پر گردش کر رہی ہے، جس میں پائل کو مبینہ طور پر دریا میں جانے سے قبل الوداع کہتے دیکھا اور سنا جا سکتا ہے۔
والد کو آخری فون کال، ’بائے بائے پاپا‘ کہہ کر 21 سالہ لڑکی دریائے چناب میں کود گئی pic.twitter.com/2vY4phqQ0D
— Urdu Report (@UrduReportpk) September 6, 2026
والد سے آخری فون پر گفتگو
پائل کے والد کرشن لال کے مطابق ان کی بیٹی اس روز ایک مقامی میلے میں گئی تھی۔ بعد میں اس نے فون کرکے طبیعت خراب ہونے اور ڈاکٹر سے ملنے کا بتایا۔
والد کے مطابق ڈاکٹر دستیاب نہ ہونے پر پائل واپس روانہ ہوئی۔ کچھ دیر بعد انہیں اس شخص کی کال موصول ہوئی جو پائل کے ساتھ تھا۔ اس شخص نے بتایا کہ پائل دریا کی طرف بھاگ گئی ہے۔
کرشن لال نے بتایا کہ انہوں نے فون پر بیٹی سے بار بار پوچھا کہ کیا کسی نے اسے کچھ کہا ہے یا اس کے ساتھ کوئی ناخوشگوار واقعہ پیش آیا ہے۔
ان کے مطابق پائل نے جواب دیا کہ ’یہ میری زندگی ہے‘ اور اس کا دل اسے یہی راستہ اختیار کرنے کا کہہ رہا ہے۔ اس کے بعد اس نے والد سے ’بائے بائے پاپا‘ کہا اور فون بند ہوگیا۔
دریائے چناب میں تلاش جاری
واقعے کی اطلاع ملتے ہی پولیس، اسٹیٹ ڈیزاسٹر رسپانس فورس اور مقامی رضاکاروں نے دریائے چناب میں تلاش شروع کردی۔
حکام کے مطابق سرچ آپریشن جاری ہے اور واقعے کے تمام پہلوؤں کا جائزہ لیا جا رہا ہے۔ حکام نے یہ بھی کہا ہے کہ لڑکی کے اس انتہائی اقدام کی اصل وجہ فوری طور پر معلوم نہیں ہوسکی۔
سوشل میڈیا پر واقعے کی ویڈیو اور مختلف دعوے بھی گردش کر رہے ہیں۔ تاہم غیرمصدقہ معلومات شیئر کرنے سے گریز کرنے کی اپیل کی جا رہی ہے، جبکہ اصل صورتحال کے لیے حکام کی تحقیقات اور ریسکیو آپریشن کے نتائج کا انتظار ہے۔
