اردو رپورٹ ڈیسک
ہالی ووڈ کی پہلی اے آئی اداکارہ قرار دی جانے والی ٹلی نارووڈ نے اپنا پہلا کیمرہ انٹرویو دیا، جس کے دوران اسے ایک غیر معمولی فرضی آڈیشن سے بھی گزارا گیا۔
سی این این کی الزبتھ ویگمیسٹر کے ساتھ ویڈیو انٹرویو میں ٹلی نارووڈ کو ایک فرضی آڈیشن کی صورتحال دی گئی۔ اسے کہا گیا کہ وہ ایسا منظر فی البدیہہ پیش کرے جس میں اسے ابھی معلوم ہوا ہو کہ اس کا کتا مر گیا ہے۔
ٹلی نارووڈ نے اس صورتحال کو مشکل قرار دیتے ہوئے کہا کہ اگر یہ حقیقی آڈیشن ہوتا تو وہ شاید مکمل طور پر ساکت کھڑی رہتی اور اس لمحے کے ’ڈیجیٹل درد‘ کو محسوس کرتی۔
اے آئی اداکارہ کی کارکردگی کا امتحان
الزبتھ ویگمیسٹر کے مطابق ٹلی نارووڈ میں حقیقی اداکاری کی صلاحیت موجود نہیں اور اسے یہ سمجھنے کے لیے مختلف پرومپٹس درکار ہوتے ہیں کہ اسے کیا کرنا ہے۔
ابتدائی پرومپٹس دیے جانے کے باوجود اے آئی اداکارہ یہ منظر مکمل طور پر پیش نہیں کر سکی۔
ٹلی نارووڈ کے پیچھے موجود کمپنی ’پارٹیکل 6‘ نے سی این این کی ٹیم کے لیے مکمل تکنیکی سیٹ اپ تیار کرنے کے لیے کمپیوٹر پر کئی گھنٹے کام کیا۔
خالق کو ہالی ووڈ میں بڑی کامیابی کی امید
ٹلی نارووڈ کی خالق ایلین وان ڈیر ویلڈن نے سی این این کو بتایا کہ انہیں امید ہے کہ یہ اے آئی تخلیق مستقبل میں اسکارلٹ جوہانسن یا نیٹالی پورٹمین جیسی مقبولیت حاصل کرے گی۔
ایلین وان ڈیر ویلڈن کا کہنا ہے کہ اس منصوبے کا مقصد روایتی فلم سازی کے کسی بھی حصے کو ختم کرنا نہیں۔ ان کے مطابق ٹلی کو کبھی بھی کسی حقیقی اداکار کا متبادل بنانے کے لیے تیار نہیں کیا گیا۔
تاہم ہالی ووڈ کی تخلیقی برادری میں اس مؤقف کو بھرپور حمایت ملنا مشکل ہے۔ جنریٹو اے آئی کو انسانی محنت، معاوضے اور تخلیقی صلاحیتوں کے لیے ایک وجودی خطرہ سمجھا جاتا رہا ہے۔
رائٹرز گلڈ آف امریکا اور اسکرین ایکٹرز گلڈ نے 2023 میں تاریخی ہڑتال کی تھی، جو تقریباً چار ماہ تک جاری رہی۔
ٹلی نارووڈ کی پہلی فلم
ٹلی نارووڈ کو اب تک ریلیز ہونے والی کسی فلم میں کاسٹ نہیں کیا گیا۔ تاہم ’دی ہالی ووڈ رپورٹر‘ کے مطابق وہ آنے والی فیچر لینتھ کامیڈی ڈراما فلم ’مِس الائنڈ‘ میں مرکزی کردار ادا کرے گی۔
فلم کو ’ہائبرڈ پروڈکشن‘ قرار دیا گیا ہے، جس میں روایتی ڈائریکٹرز، رائٹرز اور ایڈیٹرز اے آئی کے تکنیکی ماہرین کے ساتھ مل کر کام کریں گے۔
