اردو رپورٹ ڈیسک
وزیراعلیٰ پنجاب مریم نواز شریف کی چھوٹی صاحبزادی ماہ نور صفدر کے نکاح کی تاریخ مقرر کر دی گئی ہے۔ نکاح کی تقریب 12 ستمبر کو جاتی امرا میں ہوگی۔
ذرائع کے مطابق تقریب ہفتے کی شام 5 بجے شریف فارمز جاتی امرا میں منعقد کی جائے گی۔ تقریب کو سادہ اور محدود رکھا جائے گا، جس میں تقریباً 100 مہمانوں کی شرکت متوقع ہے۔
تقریب میں شریف خاندان کے افراد، قریبی عزیز و اقارب اور خاندان کے دیگر قریبی افراد کو مدعو کیا گیا ہے۔
نکاح کے بعد رخصتی بعد میں ہوگی
خاندانی ذرائع کے مطابق ماہ نور صفدر کا نکاح 12 ستمبر کو ہوگا، جبکہ ان کی رخصتی بعد میں کی جائے گی۔
ماہ نور صفدر حال ہی میں لندن سے پاکستان واپس آئی ہیں۔ مریم نواز بھی نجی دورے پر لندن گئی تھیں، جہاں انہوں نے اپنی صاحبزادی کی گریجویشن تقریب میں شرکت کی۔
ماہ نور صفدر نے لندن کی ایس او اے ایس یونیورسٹی سے تعلیم مکمل کی ہے۔
صاحبزادی کی گریجویشن کے موقع پر مریم نواز نے خوشی کا اظہار کرتے ہوئے اللہ کا شکر ادا کیا تھا۔ انہوں نے کہا تھا کہ ان کے تینوں بچوں نے اعلیٰ تعلیم مکمل کرلی ہے۔
ذرائع کے مطابق مریم نواز اپنی صاحبزادی کے ہمراہ لندن سے پاکستان واپس پہنچیں، جس کے بعد ماہ نور صفدر کے نکاح کی تاریخ حتمی کی گئی۔
خاندانی حلقوں کے مطابق نکاح کی تقریب میں سادگی کو ترجیح دی گئی ہے اور اس میں زیادہ تر قریبی رشتہ دار شریک ہوں گے۔
