بل گیٹس کا پاکستان کے زرعی شعبے میں تعاون بڑھانے پر زور، اہم امور پر شہباز شریف سے بات چیت

اردو رپورٹ ڈیسک

وزیراعظم شہباز شریف اور گیٹس فاؤنڈیشن کے چیئرمین بل گیٹس نے نیویارک میں اقوام متحدہ کی جنرل اسمبلی کے 81ویں اجلاس کے موقع پر ملاقات کی، جس میں صحت عامہ، زراعت، ڈیجیٹل جدت اور مصنوعی ذہانت سمیت مختلف شعبوں میں تعاون بڑھانے پر تبادلہ خیال کیا گیا۔

وزیراعظم آفس کے مطابق ملاقات میں پولیو کے خاتمے، ماں اور بچے کی صحت، غذائیت، حفاظتی ٹیکہ جات، ڈیجیٹل نظام اور مالیاتی شمولیت سے متعلق پاکستان کی کوششوں پر بھی بات ہوئی۔

پولیو کے خاتمے پر گفتگو

وزیراعظم شہباز شریف نے پاکستان سے پولیو کے مکمل خاتمے کے عزم کا اظہار کرتے ہوئے پولیو کے خلاف طویل عرصے سے تعاون پر گیٹس فاؤنڈیشن کا شکریہ ادا کیا۔

بل گیٹس نے کہا کہ آنے والی نسلوں کو اس بیماری سے محفوظ رکھنے کے لیے پولیو کا خاتمہ انتہائی اہم ہے۔ انہوں نے پولیو ویکسین پروگرام کے حوالے سے صوبائی حکومتوں کو وزیراعظم کی رہنمائی کو بھی سراہا۔

زرعی اصلاحات اور نئی ٹیکنالوجی

وزیراعظم نے بل گیٹس کو حکومت کی جانب سے زرعی شعبے میں کی جانے والی اصلاحات سے آگاہ کیا۔ ان اصلاحات میں جدت، حیاتیاتی ٹیکنالوجی، موسمیاتی تبدیلیوں سے مطابقت، تحقیق اور کسانوں کی استعداد کار بڑھانے پر توجہ مرکوز کی جا رہی ہے۔

دونوں جانب سے بہتر بیجوں، مویشیوں کی جینیاتی بہتری اور ابھرتی ہوئی زرعی ٹیکنالوجیز کی تیاری میں تعاون کے امکانات تلاش کرنے پر اتفاق کیا گیا۔

صحت اور مصنوعی ذہانت میں تعاون بڑھانے پر اتفاق

وزیراعظم شہباز شریف نے صحت عامہ، زراعت، ڈیجیٹل جدت اور مصنوعی ذہانت کے شعبوں میں تعاون کو مزید وسعت دینے میں بھی دلچسپی کا اظہار کیا۔

ملاقات کے اختتام پر پائیدار ترقی، تکنیکی پیش رفت اور سماجی شعبوں میں بہتر نتائج کے لیے شراکت داری مضبوط بنانے کی غرض سے رابطے جاری رکھنے کے عزم کا اظہار کیا گیا۔

وزیراعظم کی بل گیٹس کو پاکستان آمد کی دعوت

وزیراعظم شہباز شریف نے بل گیٹس کو اپنی سہولت کے مطابق جلد از جلد پاکستان کا دورہ کرنے کی دعوت بھی دی۔