’اے آئی سے تبدیل شدہ ویڈیو جنسی ہراسانی کے قریب ہے‘، جھانوی کپور

اردو رپورٹ ڈیسک

اداکارہ جھانوی کپور نے اپنی فلم ’دیورا: پارٹ 1‘ کے گانے ’چٹا مالے‘ کی مصنوعی ذہانت سے تیار اور تبدیل شدہ ویڈیو پر ردعمل دیتے ہوئے اسے خواتین کے خلاف ٹیکنالوجی کے غلط استعمال کی سنگین مثال قرار دیا ہے۔

گزشتہ چند روز سے گانے کی ایک ڈیپ فیک ویڈیو سماجی رابطے کے پلیٹ فارم ایکس پر گردش کر رہی ہے۔ اصل گانے میں جھانوی کپور اور جونیئر این ٹی آر نے اداکاری کی تھی، جبکہ زیرِ گردش ویڈیو میں مصنوعی ذہانت کے ذریعے تبدیلیاں کی گئی ہیں۔

رضامندی کے بغیر ویڈیو بنانا حدود کی خلاف ورزی

جھانوی کپور نے اپنے تفصیلی بیان میں کہا کہ کسی خاتون کو اس کی رضامندی کے بغیر قابل اعتراض انداز میں پیش کرنا اور اس نوعیت کا فرضی یا تبدیل شدہ مواد پھیلانا انتہائی تکلیف دہ اور اس کی ذاتی حدود کی خلاف ورزی ہے۔

ان کا کہنا تھا کہ خواتین کو اس انداز میں پیش کرنے کے لیے ٹیکنالوجی کا مجرمانہ استعمال ’انتہائی تکلیف دہ اور جنسی زیادتی کے قریب‘ ہے۔

خواتین کو ایسے واقعات کا سامنا

جھانوی کپور نے کہا کہ ان کی صنعت میں تقریباً ہر خاتون کو کسی نہ کسی شکل میں ایسی صورتحال کا سامنا کرنا پڑا ہے، جبکہ دنیا بھر میں بھی خواتین تیزی سے اس نوعیت کے واقعات کا نشانہ بن رہی ہیں۔

انہوں نے زور دیا کہ رضامندی، انتخاب اور عورت کے جسم کا احترام انسانی اقدار کی بنیادی شرائط ہونی چاہئیں۔

خواتین کی ذاتی حدود کا احترام ضروری

اداکارہ کے مطابق افسوس کی بات ہے کہ ان بنیادی اصولوں کو اب بھی ایک پیچیدہ مسئلہ سمجھا جاتا ہے، حالانکہ ایسا نہیں ہونا چاہیے۔

جھانوی کپور نے مزید کہا کہ کسی بھی خاتون کی ذاتی حدود کا ہر حال میں احترام کیا جانا چاہیے اور اس کا تعلق اس کے لباس سے نہیں ہونا چاہیے۔