اٹلی کے وزیر داخلہ میٹیو پینٹے ڈوسی نے اعلان کیا ہے کہ لیگل مائیگریشن کو فروغ دینے کے لیے پاکستان کی اسکلڈ لیبر فورس کے لیے 10 ہزار 500 ورک ویزے جاری کیے جائیں گے۔
یہ اعلان وفاقی وزیر داخلہ محسن نقوی سے ملاقات کے دوران کیا گیا، جس میں دوطرفہ امور اور باہمی تعاون پر تفصیلی تبادلہ خیال کیا گیا۔
اطالوی وزیر داخلہ نے مزید کہا کہ پاکستانی ڈپلومیٹک پاسپورٹ رکھنے والوں کو اٹلی کے ویزا سے استثنیٰ حاصل ہوگا۔ انہوں نے محسن نقوی کو مخاطب کرتے ہوئے کہا کہ گزشتہ ملاقات میں ڈپلومیٹک پاسپورٹ پر ویزا استثنیٰ کی جو بات کی گئی تھی، اسے عملی شکل دی جا رہی ہے۔
محسن نقوی نے غیرقانونی امیگریشن کی روک تھام کے لیے حکومتِ پاکستان کے مؤثر اقدامات سے آگاہ کیا۔ اس موقع پر اطالوی وزیر داخلہ نے غیرقانونی امیگریشن، انسانی اسمگلنگ اور منشیات کی روک تھام کے لیے پاکستانی وزارت داخلہ اور متعلقہ اداروں کی کارکردگی کو سراہا اور اسے قابل تحسین قرار دیا۔
ملاقات میں پنجاب پولیس کے افسران نے پولیس خدمت مراکز گلوبل کی افادیت پر بریفنگ دی، جسے اطالوی حکام نے سراہا۔
اس موقع پر اٹلی میں پاکستان کے سفیر علی جاوید، ڈی جی وفاقی تحقیقاتی ادارہ ڈاکٹر عثمان انور، ایم ڈی پنجاب سیف سٹی اتھارٹی احسن یونس، سینیئر پولیس افسران عابد خان اور سہیل چوہدری بھی موجود تھے۔
یہ بھی پڑھئِے
