امریکی صدر ڈونلڈ ٹرمپ کی 2025 کی مالی دستاویزات سے انکشاف ہوا ہے کہ انہوں نے اپنے خاندانی کرپٹو کرنسی منصوبوں سے تقریباً 1.2 ارب ڈالر کی آمدن حاصل کی، جس کے بعد ایک بار پھر مفادات کے ٹکراؤ پر بحث شروع ہو گئی ہے۔
امریکی آفس آف گورنمنٹ ایتھکس کی جانب سے جاری 927 صفحات پر مشتمل مالی گوشواروں کے مطابق ٹرمپ کو کرپٹو سٹارٹ اپ ورلڈ لبرٹی فنانشل (WLF) سے وابستگی کے باعث تقریباً 55 کروڑ ڈالر موصول ہوئے۔
یہ کمپنی ستمبر 2024 میں ٹرمپ کے بیٹوں اور مشرقِ وسطیٰ کے لیے ان کے خصوصی ایلچی اسٹیو وٹکوف کے بیٹے نے قائم کی تھی۔
دستاویزات میں انکشاف
دستاویزات کے مطابق جنوری 2025 میں ٹرمپ کی حلف برداری سے چند گھنٹے قبل متعارف کرائی گئی $TRUMP کرپٹو کرنسی کے لائسنسنگ معاہدے سے بھی انہیں 63 کروڑ 50 لاکھ ڈالر رائلٹی کی مد میں حاصل ہوئے۔
فوربز کے مطابق کرپٹو سرمایہ کاری ٹرمپ کی دولت میں غیر معمولی اضافے کی اہم وجہ بنی، جس کے نتیجے میں ان کے اثاثوں کی مجموعی مالیت 2024 میں تقریباً 2.3 ارب ڈالر سے بڑھ کر 2026 میں 6.5 ارب ڈالر تک پہنچ گئی۔
ٹرمپ کی کرپٹو سرگرمیوں پر سیاسی حلقوں کی جانب سے مفادات کے ٹکراؤ کے خدشات بھی ظاہر کیے گئے ہیں، کیونکہ بطور صدر انہوں نے کرپٹو انڈسٹری کے لیے ضوابط میں نرمی کے متعدد اقدامات کیے جبکہ ان کی اپنی سرمایہ کاری بھی اسی شعبے میں موجود ہے۔
وائٹ ہاوس کا موقف
تاہم وائٹ ہاؤس نے ان الزامات کو مسترد کرتے ہوئے کہا ہے کہ صدر ٹرمپ یا ان کے خاندان نے کبھی ذاتی مفادات کو سرکاری فیصلوں پر اثر انداز ہونے نہیں دیا۔
مالی گوشواروں میں خاتونِ اول میلانیا ٹرمپ کی آمدن بھی شامل ہے۔ دستاویزات کے مطابق انہیں اپنی زندگی پر بننے والی ایمیزون کی دستاویزی فلم سے ایک کروڑ ڈالر سے زائد جبکہ اپنی کتاب "Melania” کی فروخت سے پانچ لاکھ ڈالر سے زیادہ آمدن ہوئی۔
رپورٹ میں بتایا گیا ہے کہ ورلڈ لبرٹی فنانشل کے WLFI ٹوکن کی ابتدائی فروخت سے 55 کروڑ ڈالر حاصل ہوئے، تاہم ٹریڈنگ شروع ہونے کے بعد اس کی قیمت 46 سینٹ سے کم ہو کر تقریباً 6 سینٹ رہ گئی۔
مذید خبریں
ممتاز محل:چودھویں زچگی میں وفات پانے والی ملکہ کی محبت اور قربانی کی لازوال داستان – urdureport.com
محبوب نبیﷺ سے محبت : جب لیجنڈ محمد علی کا ستارہ دیوار میں لگا – urdureport.com
اسی طرح ٹرمپ اور ان کے تین بیٹوں کو کمپنی DT Marks DeFi کے ذریعے 22.5 ارب WLFI ٹوکنز بھی ملے، جن کی موجودہ تخمینی مالیت تقریباً 1.3 ارب ڈالر بتائی جا رہی ہے۔
دستاویزات کے مطابق ٹرمپ نے کرپٹو سے وابستہ دیگر کمپنیوں، بشمول کوائن بیس، میں سرمایہ کاری اور ٹرمپ برانڈ مصنوعات کی فروخت سے بھی لاکھوں ڈالر کمائے۔ ان میں موسیقار لی گرین ووڈ کے اشتراک سے فروخت کی جانے والی بائبلز سے حاصل ہونے والی 2 لاکھ 8 ہزار ڈالر سے زائد آمدن بھی شامل ہے۔
