اسلام آباد: 10 اگست 2026
وفاقی وزیر مذہبی امور سردار محمد یوسف نے اعلان کیا ہے کہ حج 2027 کا پورا عمل اینڈ ٹو اینڈ ڈیجیٹل کر دیا گیا ہے، جس کے تحت عازمین گھر بیٹھے حج درخواست مکمل کرنے، واجبات ادا کرنے اور دیگر مراحل سے متعلق سہولیات حاصل کر سکیں گے۔
وفاقی وزیر کے مطابق وزیراعظم کی ہدایات اور وزارت انفارمیشن ٹیکنالوجی و نیشنل آئی ٹی بورڈ کے تعاون سے پاک حج ایپ اور حج پورٹل کے ذریعے عازمین کو جدید ڈیجیٹل سہولیات فراہم کی گئی ہیں۔
حج 2027 کی پہلی قسط 17 اگست سے
سردار محمد یوسف نے بتایا کہ سرکاری حج سکیم 2027 کے لیے 1 لاکھ 7 ہزار 526 نشستیں مختص کی گئی ہیں۔ 40 روزہ لانگ حج سکیم کا پیکیج 12 لاکھ روپے جبکہ 20 سے 25 روزہ شارٹ حج سکیم کا پیکیج 13 لاکھ روپے مقرر کیا گیا ہے۔
حج واجبات کی پہلی قسط 17 اگست 2026 سے وصول کی جائے گی، جس میں منتخب پیکیج کی 50 فیصد رقم جمع کرانا ہوگی۔ دوسری قسط اکتوبر کے پہلے ہفتے میں طلب کی جائے گی۔
چار لاکھ رجسٹرڈ عازمین درخواست مکمل کر سکیں گے
وزیر مذہبی امور کے مطابق پری رجسٹریشن مکمل کرنے والے تقریباً 4 لاکھ رجسٹرڈ عازمین اب حج درخواست کے حتمی مرحلے میں داخل ہو سکیں گے۔
حج رجسٹریشن کے نظام کو مزید مؤثر بنانے کے لیے پاسپورٹ آفس کے ساتھ ڈیٹا شیئرنگ کا نظام بھی قائم کیا گیا ہے، جس کے ذریعے پاسپورٹ کی معلومات کی تصدیق اور درخواستوں کی پراسیسنگ میں بہتری آئے گی۔
حج واجبات کی ادائیگی کے تین ڈیجیٹل طریقے
سرکاری حج سکیم کے عازمین واجبات تین طریقوں سے ادا کر سکیں گے:
- ون لنک PSID کے ذریعے
- کریڈٹ یا ڈیبٹ کارڈ کے ذریعے
- پاک حج ایپ سے ڈیجیٹل چالان فارم ڈاؤن لوڈ کرکے حبیب بینک کی کسی بھی برانچ میں
وزارت مذہبی امور نے حبیب بینک لمیٹڈ کو مجاز بینکنگ پارٹنر مقرر کیا ہے۔
نشستیں پہلے آئیں، پہلے پائیں کی بنیاد پر
سرکاری حج سکیم میں آن لائن ادائیگی کرنے والے درخواست گزاروں کی نشستیں پہلے آئیں، پہلے پائیں کی بنیاد پر کنفرم ہوتی جائیں گی۔ نشستیں مکمل ہونے کے بعد مزید ادائیگی روک دی جائے گی۔
شارٹ حج سکیم کے لیے 30 ہزار نشستیں مختص کی گئی ہیں اور یہ تعداد مکمل ہونے پر اس سکیم کے لیے آن لائن ادائیگی کا عمل بند کر دیا جائے گا۔
اگر حج 2027 کی نشستیں مکمل ہو گئیں تو باقی رجسٹرڈ عازمین کو اگلے سال کی ویٹنگ لسٹ میں شامل کیا جائے گا، جبکہ حج 2028 سے 2030 کے لیے رجسٹریشن جاری رہے گی۔
مذید پڑھئِے
چار سالہ حج پالیسی ، پہلی مرتبہ حج رجسٹریشن اور ویٹنگ لسٹ نظام متعارف – urdureport.com
حج 2027: پاسپورٹ کی تجدید اور اجرا میں ترجیحی سہولت – urdureport.com
پرائیویٹ حج سکیم کے لیے 71 ہزار 684 نشستیں
وزیر مذہبی امور نے بتایا کہ پرائیویٹ حج سکیم کے تحت 71 ہزار 684 نشستیں مختص کی گئی ہیں۔
نجی حج سکیم کے عازمین حج پورٹل یا پاک حج ایپ کے ذریعے حکومت سے منظور شدہ 25 مجاز حج آرگنائزرز کے پیکیجز دیکھ کر اپنی پسند کا پیکیج اور کمپنی منتخب کر سکیں گے۔
حکومت نے واضح کیا ہے کہ پرائیویٹ حج سکیم میں بھی انتخاب اور ادائیگی مقررہ سرکاری ڈیجیٹل نظام کے ذریعے ہی ہوگی۔
نجی ٹور آپریٹر کو براہ راست رقم نہ دیں
سردار محمد یوسف نے عازمین حج کو خبردار کیا کہ وہ کسی بھی نجی ٹور آپریٹر یا کمپنی کو براہ راست رقم جمع نہ کرائیں۔ سرکاری ڈیجیٹل نظام سے باہر کسی بھی قسم کی مالی لین دین یا براہ راست ادائیگی قابل قبول نہیں ہوگی۔
وفاقی وزیر کے مطابق نیا ڈیجیٹل نظام عازمین کے سرمائے کے تحفظ کے ساتھ حج درخواستوں کے عمل میں شفافیت، مساوات اور میرٹ کو یقینی بنائے گا۔
انہوں نے عازمین پر زور دیا کہ وہ حج سے متعلق معلومات کے لیے صرف وزارت مذہبی امور، پاک حج ایپ اور حج پورٹل کے سرکاری ذرائع پر اعتماد کریں۔
