راولپنڈی سے تعلق رکھنے والے معمر شہری حکیم بابر اور ان کی اہلیہ نے اپنی شادی کی وائرل ویڈیوز پر عوام سے معافی مانگ لی ہے۔
حال ہی میں سوشل میڈیا پر ان کی شادی سے متعلق ویڈیوز اور تصاویر تیزی سے پھیل گئی تھیں، جس کے بعد مختلف حلقوں کی جانب سے ملے جلے ردِعمل سامنے آئے۔
اس صورتحال پر حکیم بابر اور ان کی اہلیہ نے ایک ویڈیو پیغام جاری کیا جس میں انہوں نے رمضان المبارک کے تقدس کا حوالہ دیتے ہوئے عوام سے درگزر کی اپیل کی۔
ویڈیو بیان میں حکیم بابر کا کہنا تھا کہ وہ اس معاملے سے سبق حاصل کر چکے ہیں اور آئندہ اس نوعیت کی ویڈیوز بنانے یا شیئر کرنے کی اجازت نہیں دیں گے۔
ان کی اہلیہ نے بھی عوام سے درخواست کی کہ انہیں معاف کر دیا جائے اور اس معاملے کو یہیں ختم سمجھا جائے۔
یاد رہے کہ کچھ روز قبل حکیم بابر کی ایک نوجوان خاتون سے شادی کی خبر اور ویڈیوز سوشل میڈیا پر زیرِ بحث آئیں۔ بعد ازاں دونوں میاں بیوی نے وضاحتی بیان میں کہا کہ ان کا نکاح باہمی رضامندی اور محبت کی بنیاد پر ہوا ہے۔
ان کے مطابق یہ رشتہ کسی حد تک ارینج میرج اور لو میرج دونوں کی خصوصیات کا حامل ہے کیونکہ پہلے ایک دوسرے کو پسند کیا گیا اور پھر باقاعدہ نکاح کا فیصلہ کیا گیا۔
عمر کے فرق پر ہونے والی تنقید کے جواب میں حکیم بابر نے مؤقف اختیار کیا کہ اصل اہمیت دل کی تازگی اور نیت کی سچائی کی ہوتی ہے۔ انہوں نے یہ بھی کہا کہ انہوں نے ایک طلاق یافتہ خاتون سے نکاح کر کے سنت پر عمل کیا ہے، جسے مثبت انداز میں دیکھا جانا چاہیے۔
دوسری جانب ان کی اہلیہ نے بھی شوہر کے مؤقف کی تائید کرتے ہوئے کہا کہ سچی محبت میں عمر کی قید معنی نہیں رکھتی۔ شادی کی وائرل تصاویر میں حکیم بابر کو دلہن کو گجرے پہناتے دیکھا گیا تھا، جس کے بعد یہ معاملہ سوشل میڈیا پر خاصا موضوعِ گفتگو بن گیا۔
یہ بھی پڑھئِں
