لانگ مارچ، اسلام آباد میں سیکیورٹی ہائی الرٹ، داخلی راستوں پر مزید کنٹینرز لگانے کا فیصلہ

اردو رپورٹ ڈیسک

حکومت اور پاکستان تحریک انصاف کے درمیان مذاکرات ناکام ہونے کے بعد وفاقی دارالحکومت اسلام آباد میں دوبارہ سیکیورٹی ہائی الرٹ کردی گئی ہے۔ شہر کے داخلی راستوں پر مزید کنٹینرز پہنچانے کا فیصلہ کیا گیا ہے۔

اہم شاہراہوں اور ریڈ زون میں پہلے ہی کنٹینرز موجود ہیں، جبکہ لانگ مارچ کے قریب پہنچنے پر اسلام آباد کے داخلی راستوں کو کنٹینرز اور خاردار تاروں کے ذریعے بند کرنے کی تیاری کی جارہی ہے۔

اضافی پولیس نفری تعینات

سندھ سے منگوائی گئی پولیس نفری اسلام آباد میں موجود ہے، جبکہ پنجاب سے آنے والی نفری کو اسٹینڈ بائی پر رکھا گیا ہے۔

حکام کی جانب سے لانگ مارچ کی پیش رفت کو مدنظر رکھتے ہوئے وفاقی دارالحکومت کے داخلی راستوں پر سیکیورٹی مزید سخت کرنے کے انتظامات کیے جارہے ہیں۔

رینجرز کی تعیناتی میں توسیع

اسلام آباد میں رینجرز کی تعیناتی میں بھی توسیع کردی گئی ہے۔ رینجرز اہلکاروں کی تعیناتی 5 اکتوبر سے بڑھا کر 15 اکتوبر تک کردی گئی ہے۔

اسلام آباد میں 3 ہزار رینجرز اہلکار 15 اکتوبر تک تعینات رہیں گے۔

محسن نقوی کا سخت انتباہ

اس سے قبل وفاقی وزیر داخلہ محسن نقوی نے پریس کانفرنس کرتے ہوئے کہا کہ حکومت کسی بھی صورت 9 مئی جیسے واقعات دوبارہ نہیں ہونے دے گی۔

محسن نقوی نے مذاکرات کی ناکامی کا ذمہ دار وزیراعلیٰ خیبرپختونخوا سہیل آفریدی کو قرار دیتے ہوئے کہا کہ اگر ایک بھی جان گئی تو اس کے ذمہ دار سہیل آفریدی ہوں گے۔

انہوں نے کہا کہ صوبے میں جنگ جیسی صورتحال ہے، جبکہ وزیراعلیٰ خیبرپختونخوا فوج کے خلاف بیانات دے رہے ہیں۔

لانگ مارچ کے شرکا کے لیے وارننگ

وزیر داخلہ نے کہا کہ جو بھی اسلام آباد آئے گا وہ توہین عدالت کا مرتکب ہوگا۔ انہوں نے اسلام آباد پر بار بار دھاوا بولنے کے سلسلے کو ختم کرنے کے عزم کا اظہار کیا۔

محسن نقوی نے کہا کہ لانگ مارچ کرنے والوں کو نہیں چھوڑیں گے اور حکومت خیبرپختونخوا میں بھی جائے گی۔

انہوں نے مزید کہا کہ اب صدر مملکت اور وزیراعظم جو فیصلہ کریں گے، اس پر عملدرآمد کیا جائے گا۔