میٹا نے صارفین کے لیے ایک بڑے اور نئے ڈیجیٹل نظام “یونیفائیڈ اکاؤنٹ سسٹم” کے آغاز کا اعلان کیا ہے، جس کا مقصد فیس بک، انسٹاگرام اور واٹس ایپ سمیت تمام پلیٹ فارمز پر اکاؤنٹس اور سیکیورٹی کو ایک ہی جگہ پر منظم کرنا ہے۔
کمپنی کے مطابق اس نئے نظام کے تحت صارفین کو اپنی تمام سروسز کے اکاؤنٹس، لاگ اِن تفصیلات اور سیکیورٹی سیٹنگز ایک مرکزی ڈیش بورڈ میں دستیاب ہوں گی، جس سے مختلف ایپس پر بار بار لاگ اِن کرنے کی ضرورت کم ہو جائے گی۔
میٹا کا کہنا ہے کہ موجودہ “اکاؤنٹس سینٹر” اگرچہ بنیادی سہولیات فراہم کرتا ہے، لیکن نیا سسٹم اس سے کہیں زیادہ جدید اور جامع ہوگا۔ اس کو آئندہ سال مرحلہ وار مختلف صارفین کے لیے متعارف کرایا جائے گا۔
نئے فیچر میں بڑی تبدیلی
نئے فیچرز میں ایک اہم تبدیلی یہ ہوگی کہ صارفین ایک ہی پاس ورڈ یا پاسکی کے ذریعے تمام میٹا سروسز تک رسائی حاصل کر سکیں گے۔ اس کے ساتھ بایومیٹرک لاگ اِن جیسے فنگر پرنٹ اور فیس ریکگنیشن کے آپشنز بھی شامل کیے جا رہے ہیں۔
سیکیورٹی کو مزید مضبوط بنانے کے لیے کمپنی نے مشکوک لاگ اِن کی فوری اطلاع، سیکیورٹی الرٹس اور دو مرحلہ جاتی تصدیق (2FA) کو مزید مؤثر بنانے کا بھی اعلان کیا ہے۔
اس نئے پلیٹ فارم کے ذریعے صارفین کو ایک ایسا کنٹرول سینٹر فراہم کیا جائے گا جہاں وہ اپنے پاس ورڈز، ای میلز اور دیگر اکاؤنٹ سیٹنگز کو ایک ہی جگہ سے اپڈیٹ کر سکیں گے۔
اس کے علاوہ والدین کے لیے “فیملی سینٹر” نامی فیچر کو بھی بہتر بنایا جا رہا ہے، جس کی مدد سے وہ اپنے بچوں کی سرگرمیوں پر فیس بک، انسٹاگرام اور دیگر سروسز پر ایک ہی جگہ سے نظر رکھ سکیں گے۔
میٹا نے یہ بھی واضح کیا ہے کہ جو صارفین اپنی ایپس کو الگ الگ رکھنا چاہتے ہیں ان کے لیے یہ آپشن برقرار رہے گا، اور ہر پلیٹ فارم کی انفرادی پرائیویسی سیٹنگز بھی اسی طرح کام کرتی رہیں گی۔
یہ بھی پڑھئِے
