محکمہ موسمیات نے پیش گوئی کی ہے کہ ملک بھر میں مون سون 2026 کی پہلی باقاعدہ بارشوں کا سلسلہ یکم جولائی سے شروع ہو کر 6 جولائی تک جاری رہ سکتا ہے۔ اس دوران متعدد علاقوں میں گرج چمک، تیز ہواؤں اور کہیں کہیں موسلادھار بارش کا امکان ظاہر کیا گیا ہے۔
محکمہ موسمیات کے مطابق شمالی، شمال مشرقی اور وسطی علاقوں میں بارشوں کی شدت زیادہ رہنے کی توقع ہے، جس کے باعث شہری سیلاب، نشیبی علاقوں میں پانی جمع ہونے اور پہاڑی ندی نالوں میں اچانک طغیانی کا خطرہ بھی موجود ہے۔
نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشنز سینٹر (این ای او سی) نے آئندہ ہفتے کے دوران متوقع موسمی صورتحال کا پیشگی جائزہ جاری کرتے ہوئے خبردار کیا ہے کہ یکم سے 6 جولائی کے دوران ملک کے مختلف حصوں میں مون سون بارشوں کا پہلا باقاعدہ اسپیل متوقع ہے، جس کے باعث بعض علاقوں میں موسلا دھار بارش، شہری سیلاب، لینڈ سلائیڈنگ اور مقامی ندی نالوں میں طغیانی کا خدشہ ہے۔
صوبوں کی صورتحال
پنجاب میں یکم سے 6 جولائی کے دوران لاہور، راولپنڈی، اسلام آباد، مری، گلیات، سیالکوٹ، نارووال، گوجرانوالہ، گجرات، فیصل آباد، شیخوپورہ، سرگودھا، جہلم، چکوال، اٹک، حافظ آباد، وزیرآباد اور دیگر اضلاع میں بارش اور تیز ہواؤں کی پیش گوئی کی گئی ہے۔ جبکہ 3 سے 5 جولائی کے درمیان جنوبی پنجاب کے مختلف اضلاع، جن میں ملتان، بہاولپور، خانیوال، لودھراں، ڈیرہ غازی خان، راجن پور، لیہ، ساہیوال، اوکاڑہ، قصور اور پاکپتن شامل ہیں، میں بھی وقفے وقفے سے بارش متوقع ہے۔
خیبر پختونخوا کے بیشتر اضلاع، بشمول پشاور، ایبٹ آباد، سوات، چترال، مانسہرہ، مردان، نوشہرہ، کوہاٹ، بنوں، ڈیرہ اسماعیل خان، دیر، بونیر، شانگلہ، بٹگرام، کرم، باجوڑ، خیبر اور وزیرستان میں یکم سے 5 جولائی تک بارش، گرج چمک اور تیز ہواؤں کا امکان ہے، جبکہ بالائی علاقوں میں بعض مقامات پر شدید بارش بھی ہو سکتی ہے۔
بلوچستان میں یکم سے 4 جولائی کے دوران ژوب، بارکھان، شیرانی، سبی، کوہلو، ہرنائی، نصیر آباد اور ڈیرہ بگٹی میں ہلکی سے درمیانی بارش کی توقع ہے، تاہم شمال مشرقی اضلاع میں چند مقامات پر موسلادھار بارش بھی ہو سکتی ہے۔
سندھ میں 3 اور 4 جولائی کے دوران لاڑکانہ، سکھر، جیکب آباد، دادو، کشمور، گھوٹکی، شکارپور، خیرپور، قمبر شہدادکوٹ، نوشہروفیروز اور شہید بینظیر آباد سمیت مختلف علاقوں میں بارش اور گرج چمک کی پیش گوئی کی گئی ہے۔
گلگت بلتستان کی صورتحال
گلگت بلتستان میں یکم سے 5 جولائی کے دوران گلگت، اسکردو، ہنزہ، دیامر، غذر، شگر، گانچھے اور استور میں بارش متوقع ہے، جہاں شدید بارش کے باعث لینڈ سلائیڈنگ اور مقامی سیلاب کا خدشہ ظاہر کیا گیا ہے۔
آزاد جموں و کشمیر میں بھی یکم سے 6 جولائی تک مظفرآباد، وادی نیلم، باغ، راولاکوٹ، حویلی، پونچھ، ہٹیاں، کوٹلی، بھمبر اور میرپور سمیت مختلف علاقوں میں موسلادھار بارش کی پیش گوئی کی گئی ہے، جبکہ پہاڑی علاقوں میں لینڈ سلائیڈنگ اور ندی نالوں میں طغیانی کا خطرہ موجود ہے۔
مذید خبریں
40 ڈگری گرمی یورپ میں زیادہ اور پاکستان میں کم کیوں محسوس ہوتی ہے؟ – urdureport.com
ایران سے خام تیل کی درآمد پر غور، تہران سے پاکستانی رابطے – urdureport.com
محکمہ موسمیات نے متعلقہ اداروں کو الرٹ رہنے کی ہدایت کرتے ہوئے شہریوں سے اپیل کی ہے کہ وہ غیر ضروری سفر سے گریز کریں، نشیبی علاقوں میں احتیاط برتیں اور موسم سے متعلق سرکاری ہدایات پر عمل کرتے رہیں۔
