ڈیلاس: پرتگال (Portugal) کے عالمی شہرت یافتہ فٹبالر اور کپتان کرسٹیانو رونالڈو (Cristiano Ronaldo) نے تصدیق کر دی ہے کہ فیفا ورلڈ کپ 2026 ان کے کیریئر کا آخری ورلڈ کپ ہوگا۔
اسپین (Spain) کے خلاف پری کوارٹر فائنل میچ سے ایک روز قبل میڈیا سے گفتگو کرتے ہوئے 41 سالہ رونالڈو نے کہا کہ وہ پہلے جیسے کھلاڑی نہیں رہے، تاہم اب بھی اپنی ٹیم کے لیے بہترین کارکردگی دکھانے کی صلاحیت رکھتے ہیں۔
رونالڈو نے کہا، "میں جانتا ہوں کہ میں پہلے والا کھلاڑی نہیں ہوں، لیکن اب بھی برا نہیں کھیل رہا۔ میں نے اس ورلڈ کپ میں تین گول کیے ہیں اور اپنی ٹیم کے لیے ہر ممکن کردار ادا کر رہا ہوں۔”
ریٹائرمنٹ کا فیصلہ
انہوں نے صحافیوں کی جانب سے مسلسل ریٹائرمنٹ سے متعلق سوالات پر برہمی کا اظہار کرتے ہوئے کہا، "گزشتہ 23 برس سے لوگ مجھے ختم کرنے کی کوشش کر رہے ہیں، مگر یہ وقت کا ضیاع ثابت ہوا ہے۔ میں کب کھیل چھوڑوں گا، اس کا فیصلہ میں خود کروں گا، کوئی اور نہیں۔”
پرتگالی کپتان نے کہا کہ انہیں اپنی چالیسویں سالگرہ کے بعد ہونے والی تنقید سے بھی بہت کچھ سیکھنے کا موقع ملا۔ ان کے مطابق، "تنقید انسان کو بہتر بناتی ہے، اس لیے میں ناقدین کا بھی شکریہ ادا کرتا ہوں۔”
رونالڈو نے واضح کیا کہ چاہے پرتگال ورلڈ کپ جیتے یا نہ جیتے، اس سے ان کی شخصیت یا میراث میں کوئی فرق نہیں پڑے گا۔ انہوں نے کہا، "فٹبال اور زندگی میں، میں نے ہمیشہ اپنی پوری جان لگا دی ہے اور مجھے اپنے کیریئر پر مکمل اطمینان ہے۔”
اسپین کے خلاف میچ پر بات کرتے ہوئے رونالڈو نے اعتراف کیا کہ مقابلہ انتہائی سخت ہوگا۔ ان کا کہنا تھا کہ پرتگال کو کامیابی کے لیے بھرپور اعتماد، جرات اور سخت محنت کی ضرورت ہوگی۔
