ڈیلس: فیفا ورلڈ کپ 2026 کے پہلے سیمی فائنل میں اسپین نے شاندار کھیل کا مظاہرہ کرتے ہوئے فرانس کو 2-0 سے شکست دے کر 16 سال بعد ورلڈ کپ کے فائنل میں جگہ بنا لی۔
اسپین نے میچ کے آغاز سے ہی حریف ٹیم پر دباؤ برقرار رکھا اور دونوں ہافز میں ایک، ایک گول اسکور کرکے کامیابی اپنے نام کی۔ اسپین کی جانب سے پہلا گول میکال نے پنالٹی کک پر کیا، جبکہ دوسرے ہاف میں پیڈرو پورو نے دوسرا گول کرکے فرانس کی واپسی کی تمام امیدوں پر پانی پھیر دیا۔
لامین یامال کی قیادت میں اسپین نے پورے میچ کے دوران منظم دفاع اور تیز رفتار جوابی حملوں کا بہترین مظاہرہ کیا، جبکہ کیلیان ایمباپے کی موجودگی کے باوجود فرانسیسی ٹیم کوئی گول نہ کرسکی۔
اسپین کے گول کیپر اور دفاعی لائن نے بھی شاندار کارکردگی دکھائی اور فرانس کے تمام حملوں کو ناکام بناتے ہوئے کلین شیٹ برقرار رکھی۔
اس فتح کے ساتھ اسپین دوسری بار عالمی چیمپئن بننے سے صرف ایک قدم دور رہ گیا ہے۔ اسپین نے آخری مرتبہ 2010 میں فیفا ورلڈ کپ کا ٹائٹل اپنے نام کیا تھا۔
دوسرے سیمی فائنل میں دفاعی چیمپئن ارجنٹینا اور انگلینڈ آمنے سامنے ہوں گے، جبکہ فرانس کی ٹیم اب تیسری پوزیشن کے میچ میں شرکت کرے گی۔
ٹورنامنٹ سے قبل کئی تجزیہ کار فرانس کو ورلڈ کپ جیتنے کا مضبوط امیدوار قرار دے رہے تھے، تاہم سیمی فائنل میں اسپین کی منظم حکمت عملی اور مؤثر کھیل کے سامنے فرانسیسی ٹیم بے بس دکھائی دی۔
