اردو رپورٹ ڈیسک
امریکی صدر ڈونلڈ ٹرمپ نے ڈنمارک اور گرین لینڈ کے ساتھ ایک سیکیورٹی معاہدے کا اعلان کرتے ہوئے دعویٰ کیا ہے کہ امریکا کو گرین لینڈ کی سیکیورٹی اور دیگر ضروریات سے متعلق مستقل اختیار حاصل ہوگا۔
ٹرمپ نے سوشل میڈیا پلیٹ فارم ٹروتھ سوشل پر کہا کہ معاہدے کے تحت امریکا کو گرین لینڈ اور امریکا کے دفاع و سلامتی کے لیے ضروری اقدامات کرنے کی مکمل آزادی حاصل ہوگی۔ انہوں نے یہ بھی دعویٰ کیا کہ اس معاہدے پر امریکا کو کوئی خرچ نہیں اٹھانا پڑے گا۔
گرین لینڈ میں امریکی فوجی موجودگی
ٹرمپ کے مطابق کسی مخالف ملک کو امریکی تحریری منظوری کے بغیر گرین لینڈ میں فوجی اڈہ قائم کرنے، فوجی موجودگی رکھنے یا حساس نوعیت کی سرمایہ کاری کرنے کی اجازت نہیں ہوگی۔
انہوں نے کہا کہ امریکا گرین لینڈ کے موزوں علاقوں میں بڑی فوجی موجودگی قائم کرنے کا عمل فوری طور پر شروع کرے گا اور اس سلسلے میں گرین لینڈ کے عوام کے ساتھ مل کر کام کیا جائے گا۔
امریکی حکام کے مطابق معاہدے میں گرین لینڈ تک مستقل رسائی اور فضائی حدود کے استعمال سے متعلق حقوق بھی شامل ہیں، جبکہ امریکی فوجی موجودگی میں اضافے کی گنجائش ہوگی۔
ڈنمارک اور گرین لینڈ کی خودمختاری برقرار
دستیاب تفصیلات کے مطابق معاہدے کے نتیجے میں گرین لینڈ امریکا کا حصہ نہیں بنے گا بلکہ اس کی خودمختاری ڈنمارک اور گرین لینڈ کے پاس برقرار رہے گی۔
ڈنمارک اور گرین لینڈ کی حکومتوں نے کہا ہے کہ مجوزہ معاہدہ گرین لینڈ کے مفادات، ڈنمارک کی خودمختاری اور گرین لینڈ کے عوام کے حقِ خود ارادیت کو تسلیم کرتا ہے۔
ڈنمارک کی حکومت کے مطابق تینوں حکومتیں آئندہ ہفتے اقوام متحدہ کی جنرل اسمبلی کے موقع پر معاہدے پر دستخط کرنے کی توقع رکھتی ہیں، تاہم اس کے نفاذ کے لیے ڈنمارک اور گرین لینڈ کی پارلیمانی منظوری بھی درکار ہوگی۔
معاہدے کو اسٹریٹجک اہمیت حاصل
ٹرمپ نے کہا کہ سابق امریکی صدور بھی گرین لینڈ کی اسٹریٹجک اہمیت سے آگاہ تھے، تاہم ان کے بقول کسی نے اس معاملے کو مستقل طور پر حل نہیں کیا۔
انہوں نے معاہدے کو امریکا، ڈنمارک، گرین لینڈ اور اتحادیوں کے لیے اہم قرار دیا ہے۔
ڈنمارک کی وزیراعظم میٹے فریڈرکسن نے کہا کہ معاہدہ آرکٹک اور شمالی بحرِ اوقیانوس میں مشترکہ سیکیورٹی کو مضبوط کرے گا اور ساتھ ہی ڈنمارک کی خودمختاری و علاقائی سالمیت اور گرین لینڈ کے عوام کے حقِ خود ارادیت کو تسلیم کرے گا۔
یہ بھی پڑھئِے
گرین لینڈ کی خریداری کا ممکنہ امریکی منصوبہ سامنے آگیا ہے۔ – urdureport.com
