اردو رپورٹ ڈیسک
جماعت اسلامی نے پیٹرولیم لیوی کے خلاف اپنا لانگ مارچ چند روز کے لیے مؤخر کرنے کا اعلان کر دیا ہے۔
امیر جماعت اسلامی حافظ نعیم الرحمٰن نے منگل کو ملتان میں پریس کانفرنس کرتے ہوئے کہا کہ وزیراعظم شہباز شریف کی درخواست پر لانگ مارچ مؤخر کیا جا رہا ہے تاکہ حکومت کو عوامی مسائل اور مطالبات پر بات چیت کے ذریعے پیش رفت کا موقع مل سکے۔
وزیراعظم سے رابطہ
حافظ نعیم الرحمٰن کے مطابق وزیراعظم شہباز شریف نے ٹیلی فون پر ان سے رابطہ کیا اور لانگ مارچ چند روز کے لیے مؤخر کرنے کی درخواست کی۔
وزیراعظم نے یہ درخواست جماعت اسلامی کا ٹرین مارچ ملتان پہنچنے کے بعد کی۔ انہوں نے کہا کہ پاکستان واپسی پر پیٹرولیم لیوی کے معاملے پر جماعت اسلامی کے ساتھ بامعنی مذاکرات کے لیے تیار ہیں۔
مذاکرات تک قافلے ملتان میں رہیں گے
حافظ نعیم الرحمٰن نے کہا کہ جماعت اسلامی کے قافلے اس وقت تک اپنی جگہ موجود رہیں گے جب تک ان کی وزیراعظم شہباز شریف سے ملاقات نہیں ہو جاتی۔
انہوں نے کہا کہ جماعت اسلامی حکومت کے ساتھ کسی قسم کے امن و امان کے مسئلے یا تصادم کی خواہاں نہیں۔ پارٹی عوامی مسائل اجاگر کرنے کے لیے سڑکوں پر نکلی ہے اور حکومت کو اس کے احتجاج کے حق کا احترام کرنا چاہیے۔
احتجاج ختم نہیں کیا، حافظ نعیم
امیر جماعت اسلامی نے واضح کیا کہ لانگ مارچ مؤخر کرنے کا مطلب احتجاج ختم کرنا نہیں ہے۔ جماعت اسلامی اپنے مطالبات کے لیے مہم جاری رکھے گی اور حکومت کے ساتھ عوام کو ریلیف دینے کے معاملے پر بات چیت کرے گی۔
