اردو رپورٹ ڈیسک
وزارت مذہبی امور نے عازمین حج کی سہولت کے لیے پاک حج ایپ اور ڈیجیٹل حج پورٹل میں متعدد نئی سہولتیں متعارف کرا دی ہیں، جن کے ذریعے عازمین گھر بیٹھے حج پیکیج اور رہائش سے متعلق اہم تبدیلیاں کر سکیں گے۔
نئی سہولت کے تحت عازمین کو کسی دفتر جانے کے بجائے گھر بیٹھے پیکیج کے دورانیے اور رہائش کے انتخاب میں ترمیم کی اجازت ہوگی۔
نجی حج اسکیم کی درخواستیں
وزارت مذہبی امور کے ترجمان کے مطابق نجی حج اسکیم کے تحت اب تک تقریباً 26 ہزار درخواستیں موصول ہو چکی ہیں، جبکہ 45 ہزار نشستیں اب بھی دستیاب ہیں۔
پاک حج ایپ اور ڈیجیٹل حج پورٹل کے ذریعے عازمین کو ہارڈشپ کوٹے کے تحت محرم یا معاون شامل کرنے کی سہولت بھی فراہم کر دی گئی ہے۔ ضرورت پڑنے پر درخواست منسوخ کرنے اور رقم کی واپسی کی درخواست بھی کی جا سکے گی۔
رہائش اور پیکیج میں تبدیلی
عازمین اب گھر بیٹھے دو بیڈ، تین بیڈ، فیملی روم یا مشترکہ رہائش میں سے انتخاب کر سکتے ہیں اور ضرورت کے مطابق اپنی رہائش تبدیل بھی کر سکتے ہیں۔
نئی سہولت کے تحت طویل حج پیکیج کو مختصر پیکیج اور مختصر پیکیج کو طویل پیکیج میں تبدیل کرنے کی اجازت بھی دی گئی ہے۔
طبی فٹنس سرٹیفکیٹ کی سہولت
عازمین پاک حج ایپ کے ذریعے طبی فٹنس سرٹیفکیٹ ڈاؤن لوڈ کر کے متعلقہ ڈاکٹر سے تصدیق کرا سکتے ہیں، جس کے بعد تصدیق شدہ سرٹیفکیٹ دوبارہ پورٹل پر اپ لوڈ کیا جا سکے گا۔
سمندر پار پاکستانیوں کے لیے اپنے قریب موجود ڈاکٹر سے تصدیق شدہ طبی فٹنس سرٹیفکیٹ اپ لوڈ کرنا ضروری ہوگا۔
ڈیجیٹل حج بکنگ کا عمل جاری
نیشنل انفارمیشن ٹیکنالوجی بورڈ کے تیار کردہ ڈیجیٹل حج پورٹل کے ذریعے نجی حج کی بکنگ کا عمل جاری ہے۔
نئی ڈیجیٹل سہولتوں کے ذریعے عازمین کو حج سے متعلق اہم امور آن لائن مکمل کرنے اور درخواست میں ضروری تبدیلیاں گھر بیٹھے کرنے کی سہولت فراہم کی گئی ہے۔
