اردو رپورٹ ڈیسک
امریکی صدر ڈونلڈ ٹرمپ نے ایران کے خلاف فوجی کارروائی اور سفارتی معاہدے، دونوں امکانات برقرار رکھنے کا اعلان کیا ہے۔ ان کا کہنا ہے کہ امریکا کل بھی ایران پر حملہ کر سکتا ہے، تاہم انہوں نے ممکنہ کارروائی کے وقت کے بارے میں کوئی واضح تفصیل نہیں بتائی۔
میڈیا سے گفتگو کرتے ہوئے ڈونلڈ ٹرمپ نے کہا کہ امریکا مختلف ممکنہ صورت حال کے لیے تیار ہے، جن میں ایران کے خلاف مزید فوجی کارروائی یا تہران کے ساتھ مذاکرات کے ذریعے معاہدہ شامل ہے۔
امریکا ہر صورت کامیاب ہوگا، ٹرمپ کا دعویٰ
امریکی صدر نے دعویٰ کیا کہ ایران معاہدہ کرے یا نہ کرے، دونوں صورتوں میں کامیابی امریکا کی ہوگی۔
انہوں نے یہ بھی کہا کہ امریکا نے ایران کے خلاف انتہائی مؤثر انداز میں کارروائیاں کی ہیں۔
ایران کے ساتھ بڑے معاہدے کی امید
ڈونلڈ ٹرمپ کا کہنا تھا کہ ممکن ہے انہیں اپنا مشن ختم کرنا پڑے یا ایران امریکا کے ساتھ معاہدے پر آمادہ ہو جائے۔
انہوں نے فوجی کارروائی کے امکان کے باوجود امید ظاہر کی کہ دونوں ممالک ایک بڑے اور اچھے معاہدے تک پہنچ سکتے ہیں۔
ٹرمپ کے بیانات سے ظاہر ہوتا ہے کہ ایران کے ساتھ کشیدگی کے دوران امریکی انتظامیہ فوجی دباؤ برقرار رکھنے کے ساتھ سفارتی حل کے امکان کو بھی پیش نظر رکھے ہوئے ہے۔
