اردو رپورٹ ڈیسک
وفاقی وزیر مواصلات عبدالعلیم خان نے اعلان کیا ہے کہ لاہور سے راولپنڈی تک نئی 6 لین موٹروے تعمیر کی جائے گی، جس سے دونوں شہروں کے درمیان فاصلہ 380 کلومیٹر سے کم ہو کر 280 کلومیٹر رہ جائے گا۔
منصوبہ 2027 کے آخر تک مکمل کرنے کا ہدف مقرر کیا گیا ہے۔ وفاقی وزیر کے مطابق نئی موٹروے کی تعمیر سے لاہور سے اسلام آباد تک سفر کا دورانیہ ساڑھے تین گھنٹے سے کم ہو کر ڈھائی گھنٹے رہ جائے گا۔
پنجاب کے اہم شہروں کو موٹروے سے منسلک کرنے کا منصوبہ
عبدالعلیم خان نے بتایا کہ نئی موٹروے پنجاب کے اہم شہروں گوجرانوالہ، گجرات، لالہ موسیٰ، کھاریاں اور جہلم کو آپس میں منسلک کرے گی۔
ان کے مطابق اس منصوبے سے پنجاب کے مصروف شہروں کے درمیان سڑکوں کے ذریعے رابطہ بہتر ہوگا اور مسافروں سمیت ٹرانسپورٹرز کو سفر میں سہولت ملے گی۔
سیالکوٹ موٹروے 6 لین کرنے کا فیصلہ
وفاقی وزیر مواصلات نے سیالکوٹ موٹروے کو بھی 4 لین سے بڑھا کر 6 لین کرنے کا اعلان کیا ہے۔
ان کے مطابق اس مقصد کے لیے اضافی 10 ارب روپے خرچ کرنے کا فیصلہ کیا گیا ہے تاکہ موٹروے کو 6 لین میں تعمیر کیا جاسکے۔
عبدالعلیم خان کا کہنا تھا کہ سڑکوں کے اس بنیادی ڈھانچے میں بہتری سے مسافروں اور سامان کی ترسیل کرنے والوں کے وقت اور ایندھن کی بچت ہوگی، جبکہ پنجاب کے مختلف شہروں کے درمیان آمدورفت مزید بہتر ہوگی۔
سکھر موٹروے کا سنگ بنیاد اگلے ماہ رکھنے کی کوشش
وفاقی وزیر نے بتایا کہ سکھر موٹروے کا سنگ بنیاد آئندہ ماہ رکھنے کی کوشش کی جا رہی ہے۔
ان کے مطابق سکھر موٹروے کے تین حصوں کی منظوری ہو چکی ہے۔ منصوبے میں سکھر سے حیدرآباد تک موٹروے کی تعمیر بھی شامل ہے۔
