اردو رپورٹ ڈیسک
وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال پاکستان کے پہلے خلا باز کی خلائی پرواز کی روانگی کی تقریب میں شرکت کے لیے چین کے دارالحکومت بیجنگ پہنچ گئے ہیں۔
وزارتِ منصوبہ بندی کے مطابق بیجنگ ایئرپورٹ پر چین کی گریٹ وال انڈسٹری کارپوریشن (سی جی ڈبلیو آئی سی) کے نائب صدر یانگ یونلی اور پاکستانی سفارت خانے کے حکام نے ان کا استقبال کیا۔
احسن اقبال پیر کے روز خلائی مشن کے مرکز کا دورہ کریں گے، جہاں وہ تربیت مکمل کرنے والے دونوں پاکستانی خلا باز امیدواروں سے ملاقات کریں گے۔ ان دونوں میں سے ایک کو خلائی مشن کے لیے حتمی طور پر منتخب کیا جائے گا۔
پاکستان کے لیے تاریخی لمحہ
احسن اقبال نے کہا کہ پاکستان کے پہلے خلا باز کی خلائی پرواز پوری قوم کے لیے ایک تاریخی لمحہ اور پاکستان اور چین کی مضبوط دوستی کی نئی علامت ہوگی۔
ان کا کہنا تھا کہ یہ پرواز پاکستان کے خلائی سفر کی نمائندگی کرے گی اور ملک کے نوجوانوں کے خوابوں کو زمین کی حدود سے آگے لے جائے گی۔
وفاقی وزیر نے مزید کہا کہ ہمالیہ سے بلند پاکستان اور چین کی دوستی اس تاریخی پرواز کے ذریعے آسمانوں سے بھی آگے پہنچ جائے گی۔
چینی خلائی اسٹیشن پر پہلا غیرملکی مہمان
چین کے انسان بردار خلائی مشن کے ادارے نے 7 نومبر کو اعلان کیا تھا کہ ایک پاکستانی خلا باز چین کے شینژو-24 انسان بردار خلائی مشن میں بطور پے لوڈ اسپیشلسٹ شامل ہوگا۔ اس طرح وہ تیانگونگ خلائی اسٹیشن کا دورہ کرنے والا پہلا غیرملکی شہری بن جائے گا۔
پاکستانی خلا باز کچھ عرصے کے لیے مدار میں قیام کرے گا اور بعد ازاں شینژو-23 خلائی جہاز کے ذریعے زمین پر واپس آئے گا۔
یہ چین کے انسان بردار خلائی پروگرام کی تاریخ میں چینی اور غیرملکی خلا بازوں کی پہلی مشترکہ خلائی پرواز بھی ہوگی۔
دو پاکستانی امیدواروں کی تربیت مکمل
خلائی مشن کے لیے پاکستان کے دو امیدواروں، محمد ذیشان علی اور خرم داؤد نے بیجنگ کے خلائی تربیتی مرکز میں کئی ماہ تک تربیت حاصل کی ہے۔
دونوں امیدواروں کا انتخاب تین مراحل پر مشتمل جانچ کے بعد کیا گیا۔ یہ انتخاب پاکستان اور چین کے درمیان فروری 2025 میں اسلام آباد میں طے پانے والے تعاون کے معاہدے کے تحت عمل میں آیا۔
ان میں سے ایک امیدوار خلائی مشن پر روانہ ہوگا، جبکہ دوسرا متبادل خلا باز کے طور پر خدمات انجام دے گا۔
چاند پر پہنچنے کا ہدف 2035 مقرر
احسن اقبال اس سے قبل اعلان کر چکے ہیں کہ پاکستان کا پہلا خلا باز 25 نومبر کو خلائی سفر پر روانہ ہوگا۔ انہوں نے یہ بھی بتایا تھا کہ پاکستان نے 2035 تک چاند پر پہنچنے کا ہدف مقرر کیا ہے۔
شینژو-24 مشن کے نشان میں بھی پاکستان کی نمائندگی شامل کی گئی ہے۔ اس کے ڈیزائن میں پاکستان کے قومی پھول چنبیلی کو جگہ دی گئی ہے۔

