اڈیالہ جیل میں قید سابق وزیراعظم عمران خان کی اہلیہ بشریٰ بی بی کی دائیں آنکھ کا آپریشن راولپنڈی کے ایک نجی ہسپتال میں کیا گیا ہے۔اڈیالہ جیل کے حکام کے مطابق بشری بی بی نے دائیں آنکھ کی بینائی متاثر ہونے کی شکایت کی تھی
آپریشن کہاں ہوا ؟
جیل حکام کے مطابق بشریٰ بی بی نے آنکھ کی بینائی متاثر ہونے کی شکایت کی تھی، جس پر ماہر چشم ڈاکٹروں نے معائنہ کیا اور ان میں ریٹینل ڈیٹیچمنٹ (Retinal Detachment) کی تشخیص ہوئی۔ اس بیماری کے باعث ڈاکٹروں نے فوری سرجری کا مشورہ دیا۔
بعد ازاں 16 اپریل کو انہیں راولپنڈی کے ایک نجی ہسپتال منتقل کیا گیا جہاں پروفیسر ڈاکٹر ندیم قریشی اور ان کی ٹیم نے آپریشن کیا۔ سرجری کے بعد ایک رات ہسپتال میں قیام کے بعد انہیں بہتر حالت میں دوبارہ اڈیالہ جیل منتقل کر دیا گیا، جبکہ ڈاکٹروں کے مشورے کے مطابق فالو اپ جاری رہے گا۔
ریٹینل ڈیٹیچمنٹ بیماری کیا ہے ؟
ریٹینل ڈیٹیچمنٹ ایک ایسی بیماری ہے جس میں آنکھ کے پچھلے حصے میں موجود حساس جھلی (ریٹینا) اپنی جگہ سے ہٹ جاتی ہے، اور اگر بروقت علاج نہ کیا جائے تو یہ مستقل بینائی متاثر کر سکتی ہے۔
اس کی علامات میں آنکھوں کے سامنے دھبے یا لکیریں نظر آنا، روشنی کی چمک محسوس ہونا، بینائی میں دھندلا پن یا کسی حصے پر سیاہ سایہ آ جانا شامل ہیں۔ یہ بیماری زیادہ تر عمر کے ساتھ آنے والی تبدیلیوں یا آنکھ کے اندرونی مسائل کی وجہ سے پیدا ہوتی ہے اور اس کا فوری علاج ضروری سمجھا جاتا ہے۔
بشریٰ بیبی کی اہلخانہ سے ملاقات
بشری بی بی کی فیملی کو ان سے ملاقات بھی کروائی گئی ،جیل حکام کے مطابق ملاقات کرنے والوں میں بشری بی بی کی بھابی مہرالنسا اور بیٹی مہرالنسا مانیکا شامل ہیں۔ جیل حکام کے مطابق یہ ملاقات ایک گھنٹہ تک جاری رہی۔
یہ بھی پڑھئِے
