انڈیا میں چیف جسٹس سوریہ کانت کے ایک مبینہ متنازعہ بیان کے بعد شروع ہونے والی آن لائن مہم ’’کاکروچ جنتا پارٹی‘‘ (CJP) کا ایکس اکاؤنٹ حکومت کی جانب سے معطل کر دیا گیا ہے، جس کے بعد سیاسی اور ڈیجیٹل حلقوں میں نئی بحث چھڑ گئی ہے۔
نوجوان کاکروچ کی طرح ہیں، بھارتی چیف جسٹس کے ریمارکس پر نوجوانوں نے کاکروچ جنتا پارٹی بنالی
مہم کے بانی ابھیجیت دیپکے نے جمعرات کو اپنے ذاتی ایکس اکاؤنٹ پر بتایا کہ حکومتی کارروائی کے نتیجے میں CJP کا آفیشل اکاؤنٹ انڈیا میں بلاک کر دیا گیا ہے۔ ان کے مطابق یہ اقدام متوقع تھا۔جمعرات کو اکاؤنٹ معطل کیے جانے کے صرف دو گھنٹے کے اندر اس مہم کا نیا ہینڈل سامنے آیا اور اعلان کیا گیا، ’کاکروچ اِز بیک‘۔
انڈین میڈیا رپورٹس کے مطابق یہ فیصلہ انٹیلیجنس بیورو (IB) کی سفارش پر کیا گیا، جس میں وزارت الیکٹرانکس و انفارمیشن ٹیکنالوجی کو کہا گیا تھا کہ اس اکاؤنٹ سے ایسا مواد شیئر کیا جا رہا ہے جو ریاستی اداروں اور قومی سلامتی کے لیے حساس ہو سکتا ہے۔ حکام کے مطابق یہ مہم تیزی سے نوجوانوں میں مقبول ہو رہی تھی اور بعض مواد کو اشتعال انگیز قرار دیا گیا۔
ایکس اکاونٹ معطلی پر تنقید
دوسری جانب سیاسی حلقوں میں اس فیصلے پر تنقید بھی سامنے آئی ہے۔ اپوزیشن جماعت کانگریس کے رہنما ششی تھرور نے اسے اظہار رائے پر قدغن قرار دیتے ہوئے کہا کہ اس طرح کے اقدامات عوامی بے چینی کو مزید بڑھا سکتے ہیں۔ اسی طرح سی پی آئی (ایم ایل) لبریشن نے بھی اکاؤنٹ کی معطلی کو تنقید کا نشانہ بنایا اور اسے ڈیجیٹل آزادی کے خلاف اقدام قرار دیا۔
انڈیا میں ’’کاکروچ جنتا پارٹی‘‘ (CJP) ایک غیر روایتی اور طنزیہ انداز میں ابھرنے والی سوشل میڈیا تحریک کے طور پر سامنے آئی ہے، جسے زیادہ تر نوجوان اور جین زی صارفین کی حمایت حاصل ہے۔جین زی (Gen Z) سے مراد وہ نسل ہے جو تقریباً 1997 سے 2012 کے درمیان پیدا ہوئی۔
یہ تحریک دراصل کسی باقاعدہ سیاسی جماعت سے زیادہ ایک ڈیجیٹل میم اور احتجاجی پلیٹ فارم کے طور پر جانی جاتی ہے، جہاں نوجوان اپنے غصے، مایوسی اور موجودہ سیاسی و سماجی نظام پر تنقید کو مزاحیہ اور علامتی انداز میں پیش کرتے ہیں۔
مذید پڑھئِں
مظفرآباد: تعلیمی ادارے کے پرنسپل حمزہ برہان قتل ،انڈین میڈیا کی چیخ و پکار؟ – urdureport.com
جیفری ایپسٹین کی گرل فرینڈ :کیس میں نیا موڑ – urdureport.com
اس مہم نے مختصر وقت میں بڑی مقبولیت حاصل کی، لاکھوں فالوورز اور بڑی تعداد میں رجسٹریشنز کے ساتھ یہ انڈیا کے آن لائن سیاسی بیانیے میں ایک نئی بحث کا باعث بنی۔ CJP کو نوجوان نسل کی اس سوچ کی علامت سمجھا جا رہا ہے جو روایتی سیاست سے ہٹ کر نئے انداز میں اپنی آواز بلند کرنا چاہتی ہے۔
کاکروچ جنتا پارٹی کے فالورز
ڈیجیٹل ماہرین کے مطابق ’’کاکروچ جنتا پارٹی‘‘ ایک طنزیہ اور میم بیسڈ تحریک کے طور پر شروع ہوئی تھی، لیکن مختصر وقت میں اس نے غیر معمولی مقبولیت حاصل کر لی۔ رپورٹس کے مطابق اس کے انسٹاگرام فالوورز کی تعداد لاکھوں سے کروڑوں تک پہنچ گئی تھی جبکہ بڑی تعداد میں صارفین نے خود کو اس کے ساتھ رجسٹر بھی کیا۔
مہم کے بانی ابھیجیت دیپکے کے مطابق یہ تحریک نوجوانوں میں بڑھتی ہوئی بے چینی اور مایوسی کی عکاسی کرتی ہے۔ ان کا کہنا ہے کہ یہ پلیٹ فارم دراصل موجودہ سیاسی اور سماجی نظام پر طنز اور احتجاج کی ایک نئی شکل ہے۔
اسی دوران چیف جسٹس سوریہ کانت نے اپنے بیان کی وضاحت کرتے ہوئے کہا ہے کہ میڈیا کے ایک حصے نے ان کے ریمارکس کو غلط انداز میں پیش کیا۔
اکاؤنٹ معطل ہونے کے چند گھنٹوں بعد ہی تحریک کے حامیوں نے ’’کاکروچ از بیک‘‘ کے نام سے نیا اکاؤنٹ اور آن لائن سرگرمیاں دوبارہ شروع کر دیں، جس سے یہ بحث مزید شدت اختیار کر گئی ہے کہ آیا یہ صرف ایک سوشل میڈیا میم ہے یا ایک ابھرتی ہوئی سیاسی تحریک۔
