اردو رپورٹ ڈیسک
وفاقی تحقیقاتی ادارہ (ایف آئی اے) امیگریشن کے عمل کو ڈیجیٹل بنانے اور مسافروں کو سہولت فراہم کرنے کے لیے ای امیگریشن ایپ متعارف کرانے کی تیاری کر رہا ہے۔
سفری دستاویزات اور اہلیت کی جانچ
ایپ کے ذریعے مسافر ہوائی اڈے پہنچنے سے پہلے اپنی سفری دستاویزات سے متعلق معلومات حاصل کر سکیں گے اور یہ جان سکیں گے کہ وہ سفر کے اہل ہیں یا نہیں۔
ایف آئی اے بھی اسی نظام کے ذریعے مسافروں کی دستاویزات کا جائزہ لے گا، جس سے امیگریشن کے عمل کو مزید منظم کرنے میں مدد ملے گی۔
تحقیقات والے مسافروں کو ایپ پر معلومات
کسی مسافر کے حوالے سے کوئی انکوائری درکار ہونے کی صورت میں اسے ایپ کے ذریعے متعلقہ معلومات فراہم کی جائیں گی۔
جن مسافروں کو سفر کے لیے کلیئر قرار دیا جائے گا، انہیں ایک کیو آر کوڈ فراہم کیا جائے گا۔ ہوائی اڈے پہنچنے پر اس کوڈ کے ذریعے ان کا ڈیٹا امیگریشن نظام میں حاصل کیا جا سکے گا۔
امیگریشن کلیئرنس میں سہولت
ایپ امیگریشن کلیئرنس سمیت دیگر ضروری کارروائیوں میں بھی سہولت فراہم کرے گی۔ ایف آئی اے اس نظام کے ذریعے مسافروں کی معلومات حاصل کرنے اور خطرات کی درجہ بندی کرنے کا بھی منصوبہ رکھتا ہے۔
ای امیگریشن ایپ کی تیاری آخری مراحل میں
تفصیلات کے مطابق ایپ کی تیاری آخری مراحل میں پہنچ چکی ہے۔ اس کے متعارف ہونے سے پاکستان میں امیگریشن کے عمل کو ڈیجیٹل بنانے اور ہوائی اڈوں پر مسافروں کی کلیئرنس کا عمل مزید منظم کرنے میں مدد ملے گی۔
