ریڈ کارڈ سے پاورفل ٹرمپ کارڈ: فیفا نے امریکی کھلاڑی پر پابندی ختم کر دی

فیفا نے مبینہ طور پر امریکی صدر ڈونلڈ ٹرمپ کی درخواست پر امریکی فٹبال ٹیم کے اسٹرائیکر فولارن بالوگن پر عائد ایک میچ کی معطلی کو معطل کر دیا ہے، جس کے بعد وہ بیلجیئم کے خلاف فیفا ورلڈ کپ 2026 کے راؤنڈ آف 16 کے اہم مقابلے میں شرکت کے اہل ہو گئے ہیں۔ اس فیصلے نے فٹبال حلقوں، شائقین اور سوشل میڈیا پر نئی بحث چھیڑ دی ہے۔ جس پر بیلجئیم نے قانونی آپشنز پر غور شروع کر دیا ہے۔

25 سالہ بالوگن کو بوسنیا و ہرزیگووینا کے خلاف میچ میں ڈیفینڈر طارق محریمووچ پر خطرناک فاؤل کے باعث براہِ راست ریڈ کارڈ دکھایا گیا تھا۔ اس میچ میں امریکہ نے 0-2 سے کامیابی حاصل کی تھی، جبکہ بالوگن نے بھی ایک گول اسکور کیا تھا۔

فیفا کا فیصلہ

فیفا نے اپنے بیان میں کہا کہ ڈسپلنری کوڈ کے آرٹیکل 27 کے تحت بالوگن کی ایک میچ کی معطلی کو ایک سال کے لیے پروبیشنری بنیاد پر معطل کیا گیا ہے۔ اگر وہ اس مدت کے دوران اسی نوعیت کی خلاف ورزی کرتے ہیں تو معطل کی گئی سزا دوبارہ نافذ ہو جائے گی۔

ادھر رائل بیلجیئن فٹبال ایسوسی ایشن نے فیفا کے فیصلے پر شدید تحفظات کا اظہار کرتے ہوئے کہا ہے کہ ریڈ کارڈ کے بعد اگلے میچ کی خودکار معطلی ورلڈ کپ کے واضح قوانین کا حصہ ہے، لہٰذا اس فیصلے کے خلاف تمام قانونی اور انتظامی آپشنز پر غور کیا جا رہا ہے۔

ٹرمپ کا پیغام

فیفا کے فیصلے کے بعد امریکی صدر ڈونلڈ ٹرمپ نے بھی سوشل میڈیا پر ردعمل دیتے ہوئے اسے "ایک بڑی ناانصافی کی اصلاح” قرار دیا اور فیفا کا شکریہ ادا کیا۔ بعض بین الاقوامی میڈیا رپورٹس میں یہ دعویٰ بھی سامنے آیا کہ ٹرمپ نے فیفا صدر جیانی انفانٹینو سے رابطہ کرکے اس معاملے پر نظرثانی کی درخواست کی تھی، تاہم اس دعوے کی آزادانہ تصدیق نہیں ہو سکی۔

امریکی ٹیم کے کپتان کرسچن پُلیسک نے کہا کہ بالوگن کو ریڈ کارڈ دکھانا سخت فیصلہ تھا اور پوری ٹیم ان کی معطلی ختم ہونے پر خوش ہے۔

سوشل میڈیا پر تنقید

دوسری جانب سوشل میڈیا پر بھی اس فیصلے پر شدید ردعمل دیکھنے میں آیا۔ بعض صارفین نے اسے ورلڈ کپ کی تاریخ کے متنازع ترین فیصلوں میں سے ایک قرار دیا، جبکہ کچھ نے طنزیہ انداز میں لکھا کہ بالوگن کے پاس "ریڈ کارڈ سے زیادہ طاقتور ٹرمپ کارڈ” موجود تھا۔

مذید خبریں

فیفا ورلڈکپ 2026 سانحہ! ناروے نے برازیل کو ہرا دیا،انگلینڈ بھی فتحیاب – urdureport.com

میں نے کوشش کی : نیمار کا بین الاقوامی فٹبال سے ریٹائرمنٹ کا اعلان – urdureport.com

فیفا ورلڈ کپ 2026 میرا آخری ورلڈ کپ ہوگا، کرسٹیانو رونالڈو – urdureport.com

اس کے برعکس متعدد شائقین اور مبصرین کا کہنا ہے کہ بالوگن کو ابتدا ہی میں ریڈ کارڈ نہیں دکھایا جانا چاہیے تھا، اس لیے ان کی معطلی ختم کرنا درست فیصلہ ہے۔

بالوگن اب تک ورلڈ کپ 2026 میں امریکہ کے لیے تین گول اسکور کر چکے ہیں اور ٹیم کی کامیابیوں میں اہم کردار ادا کر رہے ہیں، جس کے باعث بیلجیئم کے خلاف ان کی دستیابی کو امریکی ٹیم کے لیے بڑا ریلیف قرار دیا جا رہا ہے۔