آبنائے ہرمز کھولنے کے لیے ایران کی امریکا کے سامنے سات شرائط

اردو رپورٹ ڈیسک

ایرانی میڈیا کے مطابق ایران نے آبنائے ہرمز دوبارہ کھولنے کے لیے امریکا کے سامنے سات شرائط رکھ دی ہیں۔ رپورٹس میں بتایا گیا ہے کہ ایرانی اعلیٰ قیادت کی منظوری کے بعد یہ شرائط ثالثوں کے ذریعے واشنگٹن تک پہنچائی گئی ہیں۔

تہران کا مؤقف ہے کہ جب تک امریکا تمام سات شرائط پوری نہیں کرتا، آبنائے ہرمز بدستور بند رہے گی۔

ایران اور عمان کے درمیان نئے بحری راستے پر اتفاق

دوسری جانب ایران اور عمان کے درمیان آبنائے ہرمز میں نئے بحری راستوں کے حوالے سے اتفاق ہوگیا ہے۔

رپورٹ کے مطابق خلیجی ممالک کو پیر کے روز نئے بحری راستے کے بارے میں بریفنگ دی جائے گی۔

مجوزہ بحری راستہ مکمل طور پر ایران کی علاقائی سمندری حدود میں ہوگا اور ایرانی انتظامات کے تحت کام کرے گا۔

آبنائے ہرمز کی اہمیت

آبنائے ہرمز دنیا کے اہم ترین بحری راستوں میں شمار ہوتی ہے۔ یہ ایران اور عمان کے درمیان واقع ہے اور خلیج فارس کو خلیج عمان اور بحیرہ عرب سے ملاتی ہے۔

دنیا کی تیل کی ترسیل کا ایک بڑا حصہ روزانہ اسی تنگ بحری راستے سے گزرتا ہے۔ آبنائے ہرمز میں بحری آمدورفت متاثر ہونے سے عالمی منڈی میں تیل کی قیمتوں، بین الاقوامی تجارت اور توانائی کے تحفظ پر اثر پڑ سکتا ہے۔