پاکستان کے معروف اور سینئر فنکار فریال گوہر اور جمال شاہ نے طلاق کے تین دہائیوں سے زائد عرصے بعد اپنی علیحدگی کی اصل وجوہات پر کھل کر بات کی ہے۔
ایک دور میں دونوں کو شوبز انڈسٹری کا مثالی جوڑا سمجھا جاتا تھا۔ مداح ان کی جوڑی کو بے حد پسند کرتے تھے، اسی لیے ان کی طلاق کی خبر نے بہت سے لوگوں کو افسردہ کر دیا تھا۔
برسوں تک یہ سوال گردش کرتا رہا کہ آخر ان کے درمیان ایسا کیا ہوا جس کے باعث وہ ایک دوسرے سے جدا ہو گئے۔
حال ہی میں دونوں ایک نجی ٹی وی چینل کی رمضان ٹرانسمیشن میں ایک ساتھ شریک ہوئے، جہاں انہوں نے ماضی کی صورتحال پر تفصیل سے گفتگو کی۔
ماضی کی خوبصورت جوڑی :فریال گوہر اور جمال شاہ نے 30 سال بعد علیحدگی کی وجہ بیان کر دی pic.twitter.com/6lQnCw1RcM
— Urdu Report (@UrduReportpk) February 28, 2026
فریال گوہر اور جمال شاہ نے بتایا کہ اگرچہ ان کی طلاق 1992 میں ہوئی اور فریال 1995 میں پاکستان چھوڑ گئیں، تاہم انہوں نے کبھی مکمل طور پر رابطہ منقطع نہیں کیا اور آج بھی ایک دوسرے کا احترام کرتے ہیں۔
فریال گوہر نے علیحدگی کی وجہ بیان کرتے ہوئے کہا کہ جمال شاہ اپنی آزادی کو بہت اہمیت دیتے تھے اور شادی کی پابندیوں میں خود کو محدود محسوس کرتے تھے۔
ان کے مطابق وہ اس حقیقت کو سمجھتی تھیں کہ ہر شخص کی زندگی گزارنے کا اپنا انداز ہوتا ہے۔
دوسری جانب جمال شاہ نے بھی اعتراف کیا کہ وہ شاید ازدواجی زندگی کے لیے موزوں شخصیت نہیں تھے۔
فریال گوہر کا کہنا تھا کہ وہ اس تصور پر یقین نہیں رکھتیں کہ میاں بیوی ایک دوسرے کی ملکیت ہوتے ہیں، بلکہ اگر کوئی رشتہ ختم کرنا چاہے تو اس کے فیصلے کو عزت دینی چاہیے۔
جمال شاہ نے ایک ایسے واقعے کا بھی ذکر کیا جس نے ان کے تعلقات کو مزید متاثر کیا۔ انہوں نے بتایا کہ وہ اسلام آباد میں ایک خاتون کے ساتھ مل کر آرٹ انسٹی ٹیوٹ قائم کرنے کی کوشش کر رہے تھے۔ فریال گوہر نے انہیں اس شراکت داری سے گریز کا مشورہ دیا، مگر انہوں نے اس پر عمل نہیں کیا۔ بعد ازاں یہ منصوبہ کامیاب نہ ہو سکا۔
ان کے مطابق ازدواجی زندگی میں مسائل 1987 سے شروع ہو چکے تھے، اور بالآخر دونوں نے باقاعدہ طور پر علیحدگی اختیار کر لی۔
یہ بھی پڑھئِے
