اداکارہ رمشا خان نے اپنی بہن اور سوشل میڈیا انفلوئنسر علیشا خان کی شادی کی تقریبات میں اپنی غیر نمایاں موجودگی کی وجہ واضح کردی۔
علیشا خان کی شادی کی مختلف تقریبات کی تصاویر اور ویڈیوز سوشل میڈیا پر زیرِ بحث رہیں، تاہم ان تقریبات میں رمشا خان اور اداکار خوشحال خان کی عدم موجودگی نے مداحوں کی توجہ حاصل کی۔
شادی کی ایک تقریب میں دونوں کو ضرور دیکھا گیا، لیکن اس موقع پر انہوں نے انتہائی سادہ انداز اختیار کیا۔ رمشا خان اور خوشحال خان نے ماسک اور چشمے پہن رکھے تھے، جس سے وہ کیمروں کی توجہ سے خود کو دور رکھتے دکھائی دیے۔
رمشا خان کو موقف
ایک ٹی وی میزبان کے مطابق رمشا خان نے تقریب کے دوران اپنی نجی زندگی کے حوالے سے گفتگو کرتے ہوئے واضح کیا کہ انہیں اپنے شوہر کی جانب سے میڈیا یا عوامی سرگرمیوں سے دور رہنے کے لیے کسی قسم کی پابندی کا سامنا نہیں۔
رمشا خان نے مبینہ طور پر کہا کہ وہ اپنی مرضی سے کیمروں کے سامنے آنے سے گریز کررہی ہیں۔ ان کا کہنا تھا کہ وہ نہ تو خود کو کیمرے کے سامنے دیکھنا چاہتی ہیں اور نہ ہی اپنے نام سے سوشل میڈیا پر ہیش ٹیگز یا دیگر مواد کو پسند کرتی ہیں۔
نجی زندگی سے مطمعن
ٹی وی میزبان کے مطابق سابقہ اداکارہ اپنی موجودہ نجی زندگی سے مطمئن ہیں اور اب وہ ایک عام نجی فرد کی حیثیت سے زندگی گزارنا چاہتی ہیں۔
رمشا خان کے حوالے سے کہا گیا کہ ان کا یہ فیصلہ کسی دباؤ یا پابندی کا نتیجہ نہیں بلکہ ان کی اپنی ترجیح ہے۔ انہوں نے مداحوں اور عوام سے بھی اپنی نجی زندگی اور ذاتی فیصلے کا احترام کرنے کی توقع ظاہر کی ہے۔
رمشا خان کے شوبز سے دور رہنے کے فیصلے کے بعد ان کی نجی زندگی مداحوں کے لیے مسلسل دلچسپی کا باعث بنی ہوئی ہے، تاہم ان کی حالیہ وضاحت سے یہ بات سامنے آتی ہے کہ وہ فی الحال میڈیا کی توجہ سے دور رہ کر اپنی ذاتی زندگی پر توجہ دینا چاہتی ہیں۔
