مصری ٹی وی اینکر سارہ خلیفہ کو پھانسی کا حکم کیوں سنایا گیا؟

اردو رپورٹ ڈیسک

مصر کی فوجداری عدالت نے ٹی وی اینکر سارہ خلیفہ اور ان کے 11 ساتھیوں کو مبینہ طور پر منظم منشیات اسمگلنگ نیٹ ورک چلانے کے مقدمے میں سزائے موت سنا دی۔

اس مقدمے میں مجموعی طور پر 28 ملزمان نامزد تھے۔ ذرائع کے مطابق 9 ملزمان کو عمر قید کی سزا سنائی گئی، جبکہ 7 کو ناکافی شواہد کی بنیاد پر بری کر دیا گیا۔ حکام کا کہنا ہے کہ چھاپوں کے دوران 750 کلوگرام سے زائد منشیات کے علاوہ غیر قانونی اسلحہ اور گولہ بارود بھی برآمد کیا گیا۔

مبینہ منظم منشیات نیٹ ورک

مصری اخبار مطابق گروہ نے مبینہ طور پر ایک منظم گینگ بنا رکھا تھا، جو بیرون ملک سے خام مال درآمد کرکے رہائشی علاقوں میں مصنوعی منشیات تیار کرتا تھا۔

تفتیش کاروں کے مطابق گروہ کے ارکان نے خام مال کی خریداری، منشیات کی تیاری اور تیار شدہ منشیات کی ترسیل کی ذمہ داریاں آپس میں تقسیم کر رکھی تھیں۔ چھاپوں کے دوران بڑی مقدار میں منشیات کے ساتھ بغیر لائسنس گولہ بارود اور آتشیں اسلحہ بھی قبضے میں لیا گیا۔

سارہ خلیفہ کا ٹی وی کیریئر

39 سالہ سارہ خلیفہ نجی مصری ٹی وی چینل ’المحور‘ پر جرائم سے متعلق پروگرام ’مشن امپاسیبل‘ کی میزبانی کے باعث جانی جاتی تھیں۔

وہ ایک کاسمیٹک سرجری کلینک اور ایونٹ مینجمنٹ کمپنی کی بھی مالک تھیں۔ رپورٹ کے مطابق انسٹاگرام پر ان کے 20 لاکھ سے زائد فالوورز ہیں۔

عدالت میں فیصلہ سنائے جانے کے دوران سارہ خلیفہ مبینہ طور پر جذباتی ہوگئیں۔ مصری میڈیا کے مطابق انہوں نے الزامات سے انکار کرتے ہوئے عدالت سے رحم کی اپیل کی۔

انہوں نے کہا، ’’سر، براہ کرم میری بات سنیں! میرے والدین نے میری اچھی پرورش کی ہے۔ وہ عبادت گزار لوگ ہیں۔ مجھے منشیات کے پیسوں کی ضرورت نہیں۔ میں نے زندگی میں کبھی سگریٹ تک نہیں پی۔‘‘

گرفتاری اور اپیل کا حق

رپورٹ کے مطابق سارہ خلیفہ کو وسیع تر تحقیقات کے دوران اپریل 2025 میں گرفتار کیا گیا تھا۔

مصری قانون کے تحت سزائے موت کے مقدمات میں حتمی فیصلہ سنانے سے قبل مفتی اعظم سے مذہبی رائے لینا ضروری ہوتا ہے۔ اس کارروائی کے بعد عدالت نے اپنا فیصلہ جاری کیا۔

حالیہ عدالتی اصلاحات کے تحت ملزمان کو فیصلے کے خلاف اپیل کورٹ میں نظرثانی کی درخواست دائر کرنے کا حق حاصل ہے۔

اسی عدالت نے ہفتے کے روز ایک الگ مقدمے میں بھی سارہ خلیفہ کو 3 سال قید کی سزا سنائی۔ اس مقدمے میں ان پر اپنے ڈرائیور کو تشدد کا نشانہ بنانے اور واقعے کی ویڈیو بنانے کا الزام تھا۔

مصر میں منشیات سے متعلق سخت قوانین

رپورٹ کے مطابق مصر میں منشیات کی اسمگلنگ، دہشت گردی اور سوچ سمجھ کر کیے گئے قتل کو ریاست اور معاشرے کے خلاف انتہائی سنگین جرائم میں شمار کیا جاتا ہے۔

ایسے سنگین جرائم میں مصری قانون کے تحت سزائے موت کی گنجائش موجود ہے۔ رپورٹ میں حالیہ عدالتی فیصلے کو منظم جرائم کے خلاف مصر کی سخت پالیسی کا حصہ قرار دیا گیا ہے۔