پاکستان شوبز انڈسٹری کی معروف اداکارہ مومنہ اقبال کی جانب سے آن لائن ہراسگی اور دھمکیوں کے الزامات کے بعد متعلقہ سائبر کرائم ادارے نے معاملے کی ابتدائی جانچ کا آغاز کر دیا ہے۔
ذرائع کے مطابق اداکارہ مومنہ اقبال کی جانب سے جمع کرائی گئی درخواست میں مسلم لیگ ن کے رکن صوبائی اسمبلی پنجاب ثاقب چدھڑ اور ان کی اہلیہ سمیرا خان کو نامزد کیا گیا ،ایم پی اے کا تعلق چنیوٹ سے ہے۔ درخواست کو باقاعدہ رجسٹر کر کے ریکارڈ کا حصہ بنا لیا گیا ہے، جبکہ دونوں نامزد افراد کو مؤقف پیش کرنے کے لیے طلب کیے جانے کی اطلاعات ہیں۔
مومنہ اقبال کا موقف
چند روز قبل اداکارہ مومنہ اقبال Momina Iqbal نے سوشل میڈیا پر ایک تفصیلی بیان جاری کرتے ہوئے دعویٰ کیا تھا کہ وہ کافی عرصے سے آن لائن ہراسانی، سائبر بُلنگ اور دھمکی آمیز پیغامات کا سامنا کر رہی ہیں۔ ان کا کہنا تھا کہ مختلف اداروں سے رابطوں اور شکایات کے باوجود انہیں مطلوبہ پیش رفت دکھائی نہیں دی۔
اداکارہ نے اپنی پوسٹ میں یہ بھی مؤقف اختیار کیا تھا کہ بعض بااثر حلقے مبینہ طور پر معاملے کو دبانے کی کوشش کر رہے ہیں۔ انہوں نے خبردار کیا تھا کہ اگر ان کے تحفظ اور شکایات کے ازالے کے لیے مؤثر اقدامات نہ کیے گئے تو وہ عوام کے سامنے مزید تفصیلات لانے کے لیے پریس کانفرنس کر سکتی ہیں۔
مذید پڑھئِے
اداکارہ مومنہ اقبال کا مسلم لیگ ن کے ایم پی اے پر ہراسانی کے الزامات، – urdureport.com
اداکارہ حنا الطاف نے دورانِ شوٹنگ ہراسانی واقعہ کا انکشاف کر دیا – urdureport.com
اداکارہ کی اپیل
سوشل میڈیا بیان میں اداکارہ نے متعلقہ حکام سے فوری نوٹس لینے، الزامات کی شفاف تحقیقات کرانے اور اپنی فیملی کے تحفظ کو یقینی بنانے کا مطالبہ بھی کیا تھا۔
دوسری جانب تاحال نامزد افراد کی جانب سے ان الزامات پر کوئی تفصیلی عوامی ردِعمل سامنے نہیں آیا۔ حکام کا کہنا ہے کہ ابتدائی جانچ کے بعد دستیاب شواہد اور بیانات کی روشنی میں آئندہ قانونی کارروائی کا فیصلہ کیا جائے گا۔
