امریکی صدر ڈونلڈ ٹرمپ اور اٹلی کی وزیراعظم کے درمیان جاری بیان بازی میں مزید شدت آ گئی ہے۔ ٹرمپ کی حالیہ تنقید کے جواب میں میلونی نے واضح کیا ہے کہ اٹلی ایک خودمختار ریاست ہے اور ان کی سیاسی مقبولیت کسی غیر ملکی رہنما کی حمایت کی محتاج نہیں۔
صدر نے اپنے سوشل میڈیا پلیٹ فارم پر دعویٰ کیا تھا کہ فرانس میں منعقدہ جی-7 اجلاس کے دوران میلونی بارہا ان کے ساتھ تصاویر بنوانے کی خواہش مند تھیں۔ انہوں نے یہ بھی الزام لگایا کہ اطالوی وزیراعظم کی عوامی مقبولیت میں کمی آ رہی ہے اور اس کی ایک وجہ ایران کے جوہری پروگرام کے معاملے پر امریکہ کا مکمل ساتھ نہ دینا ہے۔
ٹرمپ نے مزید کہا کہ اٹلی نے امریکہ کو اپنی بعض فضائی تنصیبات استعمال کرنے کی اجازت نہیں دی، حالانکہ واشنگٹن نیٹو اتحادیوں کے دفاع پر بھاری اخراجات برداشت کرتا ہے۔ انہوں نے یہ تاثر بھی دیا کہ ایران کے خلاف امریکی اقدامات کے بعد میلونی دوبارہ ان کے قریب آنے کی کوشش کر رہی ہیں۔
ان الزامات پر ردعمل دیتے ہوئے میلونی نے کہا کہ ٹرمپ کی جانب سے کیے جانے والے مسلسل حملے بے بنیاد ہیں۔ ان کا کہنا تھا کہ ان کی سیاسی مقبولیت کا تعلق اٹلی کے قومی مفادات کے تحفظ سے ہے، نہ کہ کسی بیرونی رہنما کے ساتھ تعلقات سے۔
اطالوی وزیراعظم نے امریکی فوجی اڈوں کے حوالے سے بھی وضاحت کرتے ہوئے کہا کہ دونوں ممالک کے درمیان موجود معاہدوں کا اٹلی ہمیشہ احترام کرتا آیا ہے، تاہم ان معاہدوں سے ہٹ کر کوئی اقدام قبول نہیں کیا جا سکتا کیونکہ اٹلی اپنی خودمختاری پر کوئی سمجھوتہ نہیں کرے گا۔
میلونی نے اپنے بیان میں ٹرمپ کو مشورہ دیا کہ وہ اٹلی کی داخلی سیاست پر تبصرہ کرنے کے بجائے اپنی عوامی مقبولیت پر توجہ دیں۔
دوسری جانب اٹلی کے وزیر خارجہ بھی ٹرمپ کے بیانات پر سخت ردعمل دے چکے ہیں۔ انہوں نے امریکی صدر کے ریمارکس کو اٹلی کی توہین قرار دیتے ہوئے اپنا مجوزہ دورۂ امریکہ منسوخ کرنے کا اعلان کیا۔
دونوں رہنماؤں کے تعلقات میں کشیدگی گزشتہ چند ماہ کے دوران بتدریج بڑھی ہے اور مختلف عالمی و سیاسی معاملات پر اختلافات اب کھل کر عوامی بیانات کی صورت اختیار کر چکے ہیں۔
