اردو رپورٹ ڈیسک
پاکستان پیپلز پارٹی کے چیئرمین بلاول بھٹو زرداری نے اپنی منگنی اور شادی سے متعلق سوشل میڈیا پر گردش کرنے والی خبروں کی تردید کردی۔
بلاول بھٹو زرداری نے پیر 31 اگست کو سماجی رابطے کی ویب سائٹ ایکس پر جاری ویڈیو بیان میں واضح کیا کہ نہ ان کا رشتہ طے ہوا ہے اور نہ ہی منگنی ہوئی ہے۔
انہوں نے کہا کہ سوشل میڈیا نے ان کی بات پکی کرنے کے ساتھ ساتھ منگنی اور شادی بھی کروا دی، حالانکہ حقیقت میں ایسا کچھ نہیں ہوا۔ بلاول بھٹو نے مزید کہا کہ وہ کسی ’پرنسز گلوریا‘ کو بھی نہیں جانتے۔
ایک تو سوشل میڈیا نے میری بات پکی کروادی، منگنی اور شادی بھی کروادی ہے میں واضح کروں کہ ایسا کچھ نہیں ہوا ہے اور نہ ہی میں کسی پرنسز گلوریا کو جانتا ہوں سوشل میڈیا پر یہ تماشے حقیقی ایشوز پر سے توجہ ہٹانے کے لئے ہوتے ہیں۔ pic.twitter.com/IUhzPcll2r
— Urdu Report (@UrduReportpk) August 31, 2026
ذاتی زندگی کے فیصلے کا اعلان خاندان کرے گا
بلاول بھٹو زرداری نے کہا کہ اگر ان کی ذاتی زندگی سے متعلق کبھی کوئی فیصلہ ہوا تو اس کا اعلان ان کا خاندان خود کرے گا۔
انہوں نے سوشل میڈیا پر منگنی اور شادی سے متعلق قیاس آرائیوں کو اصل مسائل سے عوام کی توجہ ہٹانے والا ’تماشا‘ قرار دیا۔
منگنی سے متعلق افواہیں کیسے پھیلیں؟
گزشتہ چند روز کے دوران سوشل میڈیا پر دعوے گردش کر رہے تھے کہ بلاول بھٹو زرداری کی منگنی ایک یورپی خاندان سے تعلق رکھنے والی خاتون سے ہونے والی ہے۔ بعض دعووں میں مبینہ دلہن کو ’پرنسز گلوریا‘ کے نام سے بھی منسوب کیا گیا، تاہم ان دعوؤں کی کوئی سرکاری تصدیق سامنے نہیں آئی۔
اس سے قبل کراچی کے میئر اور پیپلز پارٹی کے رہنما مرتضیٰ وہاب بھی بلاول بھٹو کی منگنی اور شادی سے متعلق خبروں کو غلط اور بے بنیاد قرار دے چکے تھے۔
بلاول بھٹو زرداری کے تازہ بیان کے بعد انہوں نے خود بھی ان خبروں کی واضح تردید کردی ہے۔
