اردو رپورٹ ڈیسک
اسلام آباد: وفاقی آئینی عدالت نے 190 ملین پاؤنڈ کیس میں بشریٰ بی بی کی سزا معطل کرنے کی درخواست مسترد کر دی ہے۔ چیف جسٹس وفاقی آئینی عدالت امین الدین خان کی سربراہی میں دو رکنی بینچ نے فیصلہ سنایا۔
عدالت نے اس معاملے کا تین صفحات پر مشتمل تحریری فیصلہ بھی جاری کر دیا، جس میں اسلام آباد ہائی کورٹ کو مرکزی اپیل پر جلد فیصلہ کرنے کی توقع ظاہر کی گئی ہے۔
درخواست 61 روز کی تاخیر سے دائر ہوئی
تحریری فیصلے میں کہا گیا ہے کہ بشریٰ بی بی کی سزا معطلی کی اپیل مسترد کی جاتی ہے۔ درخواست گزار کی جانب سے متفرق درخواست کے ذریعے اپیل دائر کرنے میں ہونے والی تاخیر معاف کرنے کی استدعا کی گئی تھی۔
درخواست میں مؤقف اختیار کیا گیا کہ اپیل دائر کرنے میں تاخیر کی وجہ بشریٰ بی بی کی اڈیالہ جیل میں قید تھی۔ عدالت نے فیصلے میں 61 روز کی تاخیر کو نظرانداز کرنے کا ذکر بھی کیا۔
اسلام آباد ہائی کورٹ کو مرکزی اپیل جلد نمٹانے کی ہدایت
وفاقی آئینی عدالت کے فیصلے کے مطابق اسلام آباد ہائی کورٹ کے 30 اپریل کے حکم کو چیلنج کیا گیا تھا۔ سماعت کے دوران وکیل سلمان صفدر نے نواز شریف کیس کا حوالہ بھی دیا۔
تحریری فیصلے میں کہا گیا کہ اسلام آباد ہائی کورٹ میں بشریٰ بی بی کی مرکزی اپیل پہلے ہی سماعت کے لیے مقرر کی جا چکی ہے۔ اس لیے متوازی طور پر معاملے کا جائزہ لینے کے بجائے مرکزی اپیل کا فیصلہ جلد یقینی بنایا جائے۔
عدالت نے قرار دیا کہ موجودہ مرحلے پر مداخلت مناسب نہیں۔ فیصلے میں توقع ظاہر کی گئی کہ اسلام آباد ہائی کورٹ مرکزی اپیل پر جلد فیصلہ کرے گی اور غیرضروری التوا کی حوصلہ شکنی کرے گی۔
وکیل سلمان صفدر کے دلائل
سماعت کے دوران بشریٰ بی بی کے وکیل سلمان صفدر نے مؤقف اختیار کیا کہ عدالتوں نے خواتین کے مقدمات میں ہمیشہ نرم رویہ اختیار کیا ہے۔
انہوں نے قومی احتساب بیورو (نیب) کے طرزِ عمل پر تنقید کرتے ہوئے کہا کہ گزشتہ 13 ماہ کے دوران اس کا رویہ قابلِ اعتراض رہا اور نیب نے متعدد سماعتوں پر التوا حاصل کیا۔ ان کے مطابق نیب نے سزا معطلی کی درخواست پر بھی اعتراض کیا۔
سلمان صفدر نے مزید کہا کہ سزا سنائے جانے کے بعد بشریٰ بی بی کی ضمانت کا قانونی جواز پیدا ہو چکا ہے۔ ان کا کہنا تھا کہ بشریٰ بی بی نے خاتون ہونے کی بنیاد پر سزا معطل کرنے کی استدعا کی، جبکہ مقدمے میں زیادہ توجہ پی ٹی آئی کے بانی کی اپیل پر مرکوز رہی۔
چیف جسٹس کے ریمارکس
سماعت کے دوران چیف جسٹس امین الدین خان نے ریمارکس دیے کہ اس مرحلے پر مقدمے کے میرٹ پر نہیں جانا چاہیے، کیونکہ عدالت کے سامنے سزا معطلی کا معاملہ ہے۔
جسٹس باقر نجفی نے استفسار کیا کہ بشریٰ بی بی کی مرکزی اپیل کتنی مرتبہ سماعت کے لیے مقرر ہو چکی ہے۔
عدالت نے بیرسٹر سلمان صفدر کو تحریری دلائل کے نکات جمع کرانے کا حکم دیا، جبکہ چیف جسٹس امین الدین خان نے فریقین کو فیصلے کا انتظار کرنے کی ہدایت کی۔
