جرمنی نے اسپین کو شکست دیکر ہاکی کا عالمی کپ جیت لیا،پاکستان کے برابر

اردو رپورٹ ڈیسک

جرمنی نے اسپین کو ایک گول سے شکست دے کر 2026 ہاکی ورلڈ کپ کا ٹائٹل دوبارہ اپنے نام کر لیا۔ اس کامیابی کے ساتھ جرمنی نے پاکستان کے سب سے زیادہ چار عالمی اعزازات کے ریکارڈ کی برابری کر لی۔

بیلجیم کے شہر واورے میں کھیلے گئے فائنل میں جرمنی نے اسپین کو 0-1 سے شکست دی۔ میچ کا واحد گول مشیل اسٹرُتھوف نے 44ویں منٹ میں کیا۔ اسپین نے گول برابر کرنے کی بھرپور کوشش کی، تاہم جرمن دفاع نے اسے کامیاب نہیں ہونے دیا۔

جرمنی نے چوتھا عالمی اعزاز جیت لیا

جرمنی نے اس سے قبل 2002، 2006 اور 2023 میں ہاکی ورلڈ کپ جیتا تھا۔ 2026 کی فتح کے بعد جرمنی کے عالمی کپ ٹائٹلز کی تعداد چار ہوگئی ہے۔

پاکستان نے 1971، 1978، 1982 اور 1994 میں ہاکی ورلڈ کپ جیتے تھے۔ یوں جرمنی اب پاکستان کے ساتھ مشترکہ طور پر سب سے زیادہ چار عالمی کپ جیتنے والی ٹیم بن گیا ہے۔

جرمنی مسلسل دو ورلڈ کپ جیتنے والی چند ٹیموں میں بھی شامل ہوگیا ہے۔ اس سے قبل پاکستان نے 1978 اور 1982 جبکہ آسٹریلیا نے 2010 اور 2014 میں مسلسل عالمی ٹائٹلز جیتے تھے۔

پاکستان نے 11ویں پوزیشن حاصل کی

پاکستان ہاکی ٹیم نے ورلڈ کپ میں 11ویں پوزیشن حاصل کی۔

پاکستان کے لیے یہ 20 برس میں ورلڈ کپ کی بہترین پوزیشن ہے۔ قومی ٹیم نے 2010 اور 2018 کے عالمی کپ میں 12ویں پوزیشن حاصل کی تھی، جبکہ 2006 میں پاکستان چھٹی پوزیشن پر رہا تھا۔

پاکستان نے ٹورنامنٹ میں چھ میچ کھیلے، جن میں دو کامیابیاں، تین شکستیں اور ایک میچ برابر رہا۔

قومی ٹیم نے مجموعی طور پر 17 گول کیے جبکہ 23 گول برداشت کیے۔ حنان شاہد چار گول کے ساتھ پاکستان کے نمایاں اسکورر رہے۔

ورلڈ کپ میں پاکستان کی مہم

پاکستان نے گروپ مرحلے میں انگلینڈ کے خلاف 4-1 سے شکست کھائی، ویلز کے خلاف 3-3 سے میچ برابر کیا اور بھارت کے ہاتھوں 5-3 سے شکست کے بعد سیمی فائنل کی دوڑ سے باہر ہوگیا۔

اس کے بعد درجہ بندی کے مرحلے میں پاکستان نے جاپان کو 4-3 سے شکست دی، نیوزی لینڈ سے 4-2 سے ہارا اور پھر جنوبی افریقہ کو پنالٹی شوٹ آؤٹ میں شکست دے کر 11ویں پوزیشن حاصل کی۔

خواتین کا ورلڈ کپ بھی مکمل

خواتین کے ہاکی ورلڈ کپ میں ارجنٹینا نے نیدرلینڈز کو پنالٹی شوٹ آؤٹ میں شکست دے کر ٹائٹل جیت لیا۔ مقررہ وقت تک مقابلہ 1-1 سے برابر رہا، جس کے بعد ارجنٹینا نے شوٹ آؤٹ میں 3-1 سے کامیابی حاصل کی۔

2026 ہاکی ورلڈ کپ کے مردوں اور خواتین کے مقابلے بیلجیم اور نیدرلینڈز میں 15 سے 30 اگست تک کھیلے گئے۔