اردو رپورٹ ڈیسک
پاکستان میں جدید الیکٹرانک پاسپورٹ (ای پاسپورٹ) کا لازمی اجرا 23 اکتوبر 2026 سے شروع ہوگا۔ اس سے قبل یہ نظام 16 اکتوبر سے نافذ کرنے کا فیصلہ کیا گیا تھا، تاہم حکام نے منتقلی کی تاریخ میں توسیع کر دی ہے۔
ڈائریکٹوریٹ جنرل آف امیگریشن اینڈ پاسپورٹس کے مطابق اس اقدام کے تحت ملک بھر میں مشین ریڈ ایبل پاسپورٹ کے موجودہ نظام کی جگہ جدید ای پاسپورٹ نظام متعارف کرایا جا رہا ہے۔
23 اکتوبر سے صرف ای پاسپورٹ جاری ہوں گے
نئی پالیسی کے تحت 23 اکتوبر 2026 سے پاکستان کے تمام پاسپورٹ دفاتر اور بیرون ملک پاکستانی سفارتی مشنز میں نئے پاسپورٹ کے درخواست گزاروں کو صرف ای پاسپورٹ جاری کیے جائیں گے۔
حکام نے مشین ریڈ ایبل پاسپورٹ کے اجرا اور تجدید کے لیے 22 اکتوبر 2026 تک مہلت دی ہے۔ اس کے بعد نئے پاسپورٹ کے اجرا کے لیے ای پاسپورٹ کا نظام نافذ ہوگا۔
پرانے پاسپورٹ کب تک کارآمد رہیں گے؟
امیگریشن حکام کے مطابق 23 اکتوبر 2026 سے پہلے جاری کیے گئے تمام مشین ریڈ ایبل پاسپورٹ اپنی مقررہ میعاد ختم ہونے تک مکمل طور پر کارآمد رہیں گے۔
جن شہریوں کے پاس پہلے سے درست مشین ریڈ ایبل پاسپورٹ موجود ہیں، انہیں میعاد ختم ہونے سے پہلے اپنا پاسپورٹ تبدیل کرانے کی ضرورت نہیں۔ وہ اپنے موجودہ پاسپورٹ کی میعاد برقرار رہنے تک اسے سفر کے لیے استعمال کر سکتے ہیں۔
ای پاسپورٹ نظام متعارف کرانے کا مقصد
حکام کے مطابق ای پاسپورٹ نظام متعارف کرانے کا بنیادی مقصد پاسپورٹ خدمات کو جدید بنانا اور پاکستانی سفری دستاویزات کی حفاظت اور عملی استعداد کو عالمی معیار کے مطابق بہتر بنانا ہے۔
اس اقدام کے ذریعے پاسپورٹ خدمات کی سلامتی اور کارکردگی بہتر بنانے کے ساتھ نئے پاسپورٹ کے اجرا کو جدید الیکٹرانک نظام پر منتقل کیا جائے گا۔
