اردو رپورٹ ڈیسک
پاکستان نے ہاکی ورلڈ کپ 2026 میں شاندار کم بیک کرتے ہوئے جاپان کو دلچسپ مقابلے میں 4-3 سے شکست دے دی۔ اس فتح کے ساتھ قومی ٹیم نے 16 سال بعد ہاکی ورلڈ کپ میں کامیابی حاصل کی ہے۔
واگنر اسٹیڈیم میں کھیلے گئے 9ویں سے 16ویں پوزیشن کے کلاسیفکیشن میچ میں جاپان نے ابتدائی کوارٹر میں دو گول کرکے پاکستان کو مشکل میں ڈال دیا۔ ہائوتا یامادا اور کائیٹو تاناکا نے جاپان کی جانب سے گول اسکور کیے۔
دوسرا کوارٹر
دوسرے کوارٹر میں پاکستان نے کھیل میں واپسی شروع کی اور رانا وحید اشرف نے گول کرکے خسارہ کم کردیا۔ پہلے ہاف کے اختتام پر جاپان کو 2-1 کی برتری حاصل تھی۔
تیسرے کوارٹر میں قومی ٹیم نے جارحانہ کھیل پیش کیا۔ رانا وحید اشرف نے اپنا دوسرا گول کرکے مقابلہ 2-2 سے برابر کردیا، جبکہ محمد حماد الدین نے اگلے ہی منٹ میں گول کرکے پاکستان کو 3-2 کی برتری دلا دی۔
جاپان نے فوری ردعمل دیتے ہوئے کوجی یاماساکی کے گول کی مدد سے اسکور ایک بار پھر برابر کردیا، تاہم پاکستان نے ہمت نہ ہاری۔
فیصلہ کن گول
میچ کے 40ویں منٹ میں ہنان شاہد نے اہم گول کرکے پاکستان کو 4-3 کی برتری دلادی۔ آخری کوارٹر میں جاپان نے برابری کے لیے کئی حملے کیے، لیکن پاکستانی دفاع نے مضبوط مزاحمت کرتے ہوئے جاپانی ٹیم کو مزید گول کرنے سے روک دیا۔
آخری سیٹی بجنے پر پاکستان نے 4-3 سے کامیابی حاصل کی اور ٹورنامنٹ میں اپنی پہلی فتح اپنے نام کرلی۔
16 سال بعد ورلڈ کپ میں کامیابی
جاپان کے خلاف کامیابی پاکستان کے لیے اس لیے بھی اہم ہے کہ قومی ٹیم نے 16 سال کے طویل انتظار کے بعد ہاکی ورلڈ کپ میں فتح حاصل کی ہے۔
پاکستان نے آخری مرتبہ 2010 کے ورلڈ کپ میں کامیابی حاصل کی تھی، جب قومی ٹیم نے اسپین کو 2-1 سے شکست دی تھی۔ اس کے بعد پاکستان 2014 کے ورلڈ کپ کے لیے کوالیفائی نہیں کرسکا، جبکہ 2018 میں بھی اسے فتح حاصل نہ ہوسکی۔
ورلڈ کپ میں 8 سال بعد واپسی
پاکستان نے 8 سال کے وقفے کے بعد ہاکی ورلڈ کپ میں واپسی کی، تاہم مین راؤنڈ میں ٹیم کی کارکردگی توقعات کے مطابق نہیں رہی۔
قومی ٹیم کو انگلینڈ اور روایتی حریف کے ہاتھوں شکست کا سامنا کرنا پڑا جبکہ ویلز کے خلاف میچ 3-3 سے برابر رہا۔ اس طرح پاکستان نے مین راؤنڈ میں صرف ایک پوائنٹ حاصل کیا اور اگلے مرحلے کے لیے کوالیفائی نہ کرسکا۔
کلاسیفکیشن راؤنڈ میں جاپان کے خلاف شاندار واپسی نے پاکستان کو نہ صرف ٹورنامنٹ کی پہلی فتح دلائی بلکہ عالمی کپ میں 16 سال سے جاری کامیابی کے انتظار کا بھی خاتمہ کردیا۔
